फाल्गुन, २४ गते ।
जनकपुरधाम : संघिय सरकारका शिक्षा विज्ञान तथा प्रविधी मन्त्री गिरिराजमणी पोखरेलले शैक्षिक सत्र न भत्काउनका लागि पनि एसइइ नरोकेको बताएका छन् ।
साक्षरता अभियान र एसईई परिक्षा २०७६ को सन्दर्भमा छलफल गर्न प्रदेश सरकारद्वारा आयोजित कार्यक्रमलाई सम्बोधन गर्दै मन्त्री पोखरेलले कोरोना भाइरस रोकथामको तयारीका लागि सरकार सचेत रहेको बताउदै शैक्षिकसत्र नभत्कियोस भने उद्देश्यले समयमै परिक्षा लिन लागेको बताए ।
मन्त्री पोखरेलले शिक्षाको समस्या र चुनौतीको बखान गर्दा महाभारत जस्तै हुने बताउदै समस्या र चुनौती समाधानकै लागि नेतृत्व आवयश्क हुने बताए । कर्णाली प्रदेश पछाडी प्रदेश २ कै शिक्षा क्षेत्रमा व्यापक समस्या रहेपनि प्रदेश २ को अतित निकै राम्रो भएकाले सुधार गर्न सकिने बताए ।
कार्यक्रममा सम्बोधन गर्र्दै प्रदेश २ का मुख्यमन्त्री लालबाबु राउतले राज्यले शिक्षालाई प्राथमिकतामा नराखेकाले यस्तो अवस्था आएको बताए । माध्यमिक तहको शिक्षामा कक्षा ८ सम्म स्थानिय तह र ८ देखि कक्षा १२ सम्मको तह प्रदेश सरकारको मातहत हुनुपर्नेमा नभएको बताएका छन् ।
स्थानिय तहमा अधिकार दिइए पनि स्थानिय तहलाई प्रयाप्त स्रोत साधन नरहेकाले काम गर्न नसकेको मुख्यमन्त्री राउतको भनाई छ । कार्यक्रममा प्रदेश २ का समाजिक विकास मन्त्री नवल किशोर साहले संघिय लोकतान्त्रिक गणतन्त्र आएपछि पनि शिक्षाको स्तरमा सुधार हुन नसक्नु दुःखद रहेको बताए । कार्यक्रममा विभिन्न जिल्लाका प्रमुख जिल्ला अधिकारी, जिल्ला समन्वय समितिका प्रमुखहरु सहितको सहभागिता थियो ।
