एसपी रिपोर्टर
जनकपुरधाम, असोज ३० :
विद्युतीय सवारीसाधनप्रति आकर्षण बढ्दै गएको अवस्थामा जनकपुरधाममा भारतीय जिलियो ब्रान्डका इलेक्ट्रिक स्कुटरको बिक्री सुरु भएको छ । जनकपुरधामको मिल्स एरियास्थित जनकनन्दनी ट्रेडर्समार्फत स्कुटरको बिक्री सुरु गरिएको हो ।
जनकपुरधाम उद्योग वाणिज्य संघका अध्यक्ष सुरेन्द्र भण्डारीले शोरुमको उद्घाटन गरेका छन् । गो ग्रिन बिजनेस सोलुसन प्राइभेट लिमिटेडका निर्देशक राकेश गुप्ताका अनुसार शोरुममा जिलियो ब्रान्डका पाँचवटा मोडलका इलेक्ट्रिक स्कुटर उपलब्ध छन् ।
मोडलअनुसार स्कुटरको मूल्य १ लाख ६० हजारदेखि २ लाख ३० हजार रुपैयाँसम्म रहेको गुप्ताले जानकारी दिए । उनका अनुसार ग्राहकले लिड एसिड र लिथियम ब्याट्रीयुक्त स्कुटरमध्ये आफूलाई उपयुक्त विकल्प छनोट गर्न सक्नेछन् ।
कम्पनीका अनुसार स्कुटरका विभिन्न मोडलले एकपटक पूर्ण चार्ज गर्दा करिब ७० देखि ९० किलोमिटरसम्म दूरी तय गर्न सक्छन् । केही मोडलमा भने १२० किलोमिटरसम्मको रेन्ज दाबी गरिएको छ । यद्यपि, वास्तविक रेन्ज ब्याट्रीको अवस्था, सडकको प्रकृति, सवारीको गति र भारअनुसार फरक पर्न सक्छ ।
गुप्ताका अनुसार ब्याट्री तथा मोडलअनुसार दुईदेखि तीन वर्षसम्मको वारेन्टी उपलब्ध गराइनेछ । स्कुटर खरिद गर्नुअघि ग्राहकले ब्याट्रीको प्रकार, चार्जिङ समय, वारेन्टीका सर्त तथा बिक्रीपछिको सेवाबारे जानकारी लिन सक्नेछन् ।
उनका अनुसार कम्पनीले नेपालका विभिन्न नौ स्थानमा शोरुम सञ्चालन गरिसकेको छ । जनकपुरधामस्थित शोरुम कम्पनीको दसौँ शाखा हो । भारतीय बजारमा जिलियो ब्रान्डका स्कुटरले राम्रो प्रतिक्रिया पाइरहेको दाबी गर्दै गुप्ताले जनकपुरधाममा पनि ग्राहकको आकर्षण बढ्ने विश्वास व्यक्त गरे ।
शोरुम उद्घाटनका क्रममा उद्योग वाणिज्य संघका अध्यक्ष भण्डारीले नयाँ व्यवसाय सञ्चालनमा आउनुले स्थानीय व्यापारिक गतिविधि विस्तारमा सहयोग पुग्ने बताए । नयाँ ब्रान्ड बजारमा प्रवेश गर्दा उपभोक्ताले विभिन्न विकल्पमध्ये आफूलाई उपयुक्त सवारीसाधन छनोट गर्न पाउने उनको भनाइ थियो ।
विद्युतीय सवारीसाधनको प्रयोगले इन्धन खर्च घटाउन सहयोग पुग्ने उल्लेख गर्दै भण्डारीले यसको बजार विस्तारका लागि गुणस्तरीय उत्पादन, भरपर्दो बिक्रीपछिको सेवा र स्पेयर पार्ट्सको सहज उपलब्धता आवश्यक रहेको बताए।