एसपी रिपोर्टर
जनकपुरधाम, बैशाख २१ : बढि भाउ लिएर सिमेन्ट बेचेको भन्दै प्रहरीले एकजनालाई पक्राउ गरेकोछ । सो आरोपमा आइतवार दिउसो धनुषाको जनकपुरधाम उपमहानगरपालिका वडा नं. ११ स्थित रहेको आन्नद इन्टर प्राईजेज हार्डवयर पसलका संचालक वर्ष ४८ को राम प्रताप साहलाई पक्राउ गरिएको छ ।
बजार भाउ भन्दा बढि मुल्यमा सिमेन्ट विक्री गर्दै गरेको अवस्थामा प्रहरी टोलीले उक्त पसलबाट शिवम सिमेन्ट १६ बोरा, मारुति सिमेन्ट ३३ बोरा गरी जम्मा ४९ बोरा सिमेन्ट सहित निज संचालकलाई नियन्त्रणमा लिएको धनुषा प्रहरीले जनाएको छ । उनको विरुद्व कालोबजारी मुद्दा शिर्षकमा सात दिन म्याद थप गरी आवश्यक अनुसन्धान गरिरहेको प्रहरीको भनाई छ ।
साथै आइतवारै जनकपुरधामको माछाबजार स्थित रहेको चन्दन आईरन स्टोरको संचालक सत्यनारायण चौधरीको छोरा वर्ष २० को चन्चल कुमार चौधरीले बजार भाउ भन्दा बढि मुल्यमा सिमेन्ट विक्री गर्दै गरेको अवस्थामा प्रहरी टोलीले निजको गोदाममा मौजुद शिवम सिमेन्ट ३५० बोरा, मारुती सिमेन्ट २० बोरा र निजको पसलमा सगरमाथा सिमेन्ट ५० बोरा गरी जम्मा ४२० बोरा बरामद गरि निजकै गोदाम र पसलमा रितपुर्वक सिल गरि निज चन्चल कुमार चौधरीलाई नियन्त्रणमा लिई आवश्यक अनुसन्धान गरिरहेको बताएको छ ।
