एसपी रिपोर्टर
जनकपुरधाम, भदौ १० : वरिष्ठ पत्रकारहरूले पत्रकारिता क्षेत्रमा विकृति बढदै गएकाले वास्तविक पत्रकारहरूको पेशामा नै आँच आउने अवस्थाको सृजना भएको बताएका छन् । विकृति रोक्नका लागि पत्रकारितामा कडाइ र नियमन आवश्यक रहेको उनीहरुको निश्कर्ष थियो ।
नेपाल पत्रकार महासङ्घ धनुषाको संयोजन तथा फ्रि मिडिया नेटवर्कको आयोजनामा नेपाल पत्रकार महासंघ धनुषाको सभाकक्षमा भएको “सञ्चार नीति संवाद” कार्यक्रममा सहभागीहरुले यस्तो चिन्ता जताएका हुन ।
पत्रकारिता क्षेत्रमा विगत केही समय यता आएर बढ्दै गएको विकृति तथा विसङ्गतिका कारण समग्र पत्रकारिता क्षेत्र नै बदनाम भइरहेकोमा दशकौँसम्म पत्रकारितामा जीवन बिताएका वरिष्ठ पत्रकारहरुले चिन्ता व्यक्त गरेका थिए । यसका साथै सामाजिक सञ्जालका कारणले पनि पत्रकारिता क्षेत्र कमजोर बनिरहेको बताउँदै उनीहरु पत्रकारितामा प्रवेश गर्नका लागि योग्यता परीक्षाको व्यवस्था गर्न जरुरी रहेकोमा जोड दिए ।
सहभागीहरूले वकालत गर्न, उपचार गर्नका लागि लिने परीक्षा जस्तै पत्रकारिता गर्न चाहनेका लागि त्यसै प्रकारको परीक्षा प्रणालीको विकास गर्नुपर्ने बताए । स्नातक उत्तीर्ण गर्ने र पत्रकारिता अध्ययन गर्ने बित्तिकै पत्रकारिता गर्न पाउने सम्पादक बन्ने नीतिमा संशोधन गर्न जरुरी रहेको उनीहरुको तर्क थियो ।
वरिष्ठ पत्रकार तथा प्रेस स्वतन्त्रता सेनानी राजेश्वर नेपालीले पत्रकारिता क्षेत्रले उठाउनु पर्ने धेरै विषयहरु हुँदाहुदै पत्रकारहरूले ध्यान नदिएर चाकडी तथा चाप्लुसी गर्ने, रकम हत्याउने प्रवृत्ति बढ्नु चिन्ताको विषय भएको बताए । पत्रकारिता क्षेत्रको सुधारका लागि शुद्धीकरण अभियान चलाउन आवश्यक रहेको बताउदै नेपालीले जनकपुरधामको पत्रकारिताको इतिहासका विषयमा जानकारी गराएका थिए ।
मधेश प्रदेशका मिडिया काउन्सिलका अध्यक्ष शिवहरि भट्टराईले पत्रकारिता क्षेत्रलाई बिश्वसनिय र मर्यादित बनाउनका लागि पत्रकारितामा प्रवेश गर्न योग्यता प्रणालीको परीक्षा उत्तीर्ण गरेको हुनुपर्ने प्रावधान ल्याउन आवश्यक भएको बताए । मधेश प्रदेश आमसञ्चार प्राधिकरणका अध्यक्ष श्यामसुन्दर यादवले जनकपुरधामको अधिकांश साप्ताहिक पत्रपत्रिका कपीपेष्ट भएको पाइएको बताउँदै त्यसमा सुधार गर्नका लागि सुझाव दिँदै सामाजिक सञ्जालको नियमन तथा नियन्त्रण चुनौतीको विषय बनेको बताए ।
कार्यक्रममा धनुषाका प्रमुख जिल्ला अधिकारी सुरेन्द्र पौडेल, धनुषाका प्रहरी उपरीक्षक बसन्त रजौरे, महासङ्घ धनुषाका अध्यक्ष मनिका झा, वरिष्ठ पत्रकार श्यामसुन्दर शशी, ईयूका प्रतिनिधि शिव भण्डारी, फ्रि मिडिया नेटवर्कका प्रतिनिधि रामजी दहाल सहितको उपस्थिती थियो । कार्यक्रमको सञ्चालन महासंघका सचिव बटुकनाथ झाले गरेका थिए ।
