एसपी रिपोर्टर
जनकपुरधाम, वैशाख २० : युवाहरुले पालिकाको साना बालबालिकालाई बौद्धिक राहत वितरण अभियान सुरु गरेको छ । कोरोना भाइरस (कोभिड १९) को संक्रमण नियन्त्रण गर्न घोषित लकडाउनको बेला सबैला नगरपालिकाभित्र प्राथमिक विद्यालयका शिक्षक, बाल शिक्षकलगायत विभिन्न शैक्षिक संस्थामा कार्यरत सहयोगी कार्यकर्तालाई नगरपालिका र निक शिक्षा दिअ परियोजनाले यो अभियानमा लाग्न आग्रह गरेको थियो ।
लगत्तै गत बिहीबार बसेको नगर युवा सञ्जालको बैठकले यस अभियानलाई प्रभावकारी बनाउन सम्पूर्ण युवा क्लवहरुमा आवद्ध युवालाई सशक्त रुपमा प्रस्तुत हुन निर्णय ग¥यो । नगरपालिका, निक शिक्षा दिअ परियोजना र युवा सञ्जालले संयुक्त रुपमा अग्रसरता लिएपछि सबैला नगरपालिकामा बौद्धिक राहत वितरण अभियानले गति लिने सम्भावना देखिएको छ ।
अभियान तहत शनिबारसम्म १४ जना शिक्षक, १० जना ठुली दिदी र ११ जना युवाले प्रति व्यक्ति ५ जना बालबालिकालाई बिहानको समयमा एक घण्टा पढाउन थालेको सञ्जालका अध्यक्ष सुरेश यादव बताउँछन् । यसरी पढाउनेको संख्या बढाउन सबै पक्ष सक्रिय रहेको बताउँदै उनले लकडाउनको पालना गर्दै सामाजिक तथा भौतिक दुरी कायम गरी नगरपालिकाका एक हजार बालबालिकालाई अभियानमा जोड्ने दावी गरे ।
लकडाउनको कारण लामो समयसम्म विद्यालय बन्द हुन पुगेपछि बालबालिकालाई शिक्षण सिकाई प्रक्रियाबाट टाढा जान नदिन यो अभियान सञ्चालन गरिएको हो । नगर युवा सञ्जालले शिक्षित सबैला सचेत सबैला निर्माण अभियानसँग बौद्धिक राहत वितरण कार्यलाई जोड्ने महासचिव मिथिला साहले बताए । सञ्जाललाई नगर र नगरबासीको हितमा क्रियाशिल बनाउन निकट भविष्यमा कार्ययोजना बनाएर अघि बढ्ने सचिव ओमप्रकाश नायकको भनाई छ ।
