एसपी रिपोर्टर
जनकपुरधाम, भदौ २१ : जनकपुरधामका उद्योगी व्यापारीहरुले आफना समस्या र पिडाहरुको विषयमा प्रदेश २ सरकार र स्थानिय प्रशासनलाई ध्यानाकर्षण गराएको छ । कोरोना महामारीबाट जारी गरिएको लकडाउन र निषेधाज्ञाका कारण सृजित समस्या र उधोगी व्यावसायीहरुको पीडा सम्बोधन गर्न जनकपुरधाम उधोग बाणिज्य संघले सरोकारबाला निकायसँग माग गरेको छ ।
व्यापारीहरु विहान १० बजेदेखि बेलुका ४ बजेसम्म बजार व्यावसाय संचालनको वातावरण बनाइदिन सहितका माग राख्दै संघले राखेको छ । संघका अध्यक्ष ललित कुमार साहको नेतृत्वको पदाधिकारीहरु सहित व्यापारीहरुको टोलीले आज मुख्यमन्त्री लालबाबु राउत र प्रमुख जिल्ला अधिकारी प्रेम प्रसाद भट्टराईलाई भेटेर ज्ञापनपत्र बुझाएका हुन् ।
साथै औषधी, डेरी, कृषि सामग्री, मल, विउ, विजन, भेटनरी पसल, खाद्यान्न पसल किराना तथा बैंक, वित्तिय संस्थाहरु नियमित संचालन गर्न पाउनु पर्ने ज्ञापनपत्रमा उल्लेख गरिएको छ । हरियो तरकारी तथा फलफुल, घुमती पसल साइकिल, ठेला, मोटरसाइकल, टेम्पुमा राखि टोल टोलमा घुमाएर विहान ५ बजेदेखि १० बजेसम्म र साँझ ५ बजेपछि मात्र बेचविखन गर्ने व्यवस्था मिलाउनुपर्ने पनि मांग उनीहरुको छ ।
यस्तै कोरोना परीक्षणको दायरा बढाउन, दुई वटा थप पिसिआर मेसिन तुरुन्त संचालन गर्न र कोभिड अस्पताल संचालन गर्न पनि संघले माग गरेको छ । ज्ञापनपत्र बुझ्दै मुख्यमन्त्री लालबाबु राउत र प्रमुख जिल्ला अधिकारी भट्टराईले व्यापारीहरुको पिडा आफुहरु बुझिरहेको बताउदै संघले राखेको मागप्रति गम्भिर भई आजै देखि कार्यान्वयन गर्ने र बजार खोल्ने समय बढाउने प्रतिवद्धता जाहेर गरेको संघका महासचिव जितेन्द्र महासेठले जानकारी दिएका छन् ।
