एसपी रिपोर्टर
जनकपुरधाम, जेठ १२ : कोभिड १९ विशेष प्रादेशिक अस्पताल जनकपुरधामबाट फरार भएका एकजना संक्रमितलाई प्रहरीले पुन ः पक्राउ गरेको छ । पुनः उनलाई उनकै गृह जिल्ला सर्लाहीको धनकौलवाट फेला पारिएको धनुषा प्रहरीले जनाएको छ । उनी शनिवार मध्यराति फरार भएका थिए । सर्लाही धनकौलका ४० वर्षीय ती संक्रमित प्रहरीको आँखा छलेर मध्यरातमा फरार भएका थिए ।
अस्पतालका कोभिड १९ फोकल पर्सन डाक्टर कुलदीप पण्डितका अनुसार उनको आइतवार १४ औं दिनको स्वाब संकलन गर्ने तयारी थियो । यसअघि पनि उनी आइसोलेसनबाट भागेका थिए । यसअघि भागेर रातभरमा गाउँ पुगेका उनलाइे ल्याइएको थियो । मानसिक सन्तुलन ठिक नभएको समस्याका कारण उनलाई छुट्टै कोठामा राखिएको थियो । उनलाई मानसीक रोग विशेषज्ञले पनि उपचार गरिरहेका छन् । उनी गत वैशाख ३१ गते अस्पताल भर्ना भएका थिए । उनी रहेको कोठामा रहेको सीसीटिभी क्यामेरा बटारेर झयाल फोडेर फरार भएको उनलाई पुन ः अस्पताल ल्याउने काम भइरहेको प्रहरीले जनाएको छ ।
