एसपी रिपोर्टर
जनकपुरधाम, जेठ ३ : देशमा तिनतहको सरकार भनिन्छ तर सरकार कस्तो हुन्छ भन्ने अनुभुति हुन सकेको छैन । कोरोना महामारी नियन्त्रणका लागि सरकारले जारी गरेको लकडाउनको ५४ औं दिन चलिरहँदा समेत तिनैतहको सरकार कोरोना संक्रमितहरुको लागि कुनै पनि व्यवस्थापन गर्न नसकेर नक्कमा सावित भएको छ ।
एक त आफै संक्रमित थप त्यसमा परिवारका बालबच्चा सहित सदस्यहरु पनि क्वारेन्टाइनमा राखिएको चिन्ता, न पिउने पानी छ न त फेर्ने कपडा नै जनकपुरधाम प्रादेशिक अस्पतालको आइशोलेसनमा रहेका संक्रमितहरुको यस्तै पिडाले अहिले उनीहरुको बिजोग छ तर सुन्ने कोहि पनि छैन । रोगको डर र भय तथा आफनो समस्या र पिडाहरु त छदैछ बालबच्चाहरु जो क्वारेन्टाइनमा छन उनीहरुको समस्या र चिन्ताले समेत उनीहरुको मनोबल टुटेको छ ।
आइशोलेसनका एक विरामी भन्छन, ‘यस अघि आइशोलेसनवाट विरामीहरु किन भागेको होला सुन्दा अच्चम पर्थे तर आज वास्तिवक थाहा पाउदै छु ।’ उनले उपचार र हेरचाह नै नहुने भए अस्पतालमा आइशोलेट भएको कुनै तुक नै नरहेको बताए । घरवाट कपडा पठाएको पनि २४ घण्टा भयो तर कपडा आफुले अझै पाउन नसकेको संक्रमितको भनाई छ । पानी खान कुनै पनि गिलास भए हुने भन्दै गिलास माग्यौं तर दुई दिन भयो गिलास पाइएको छैन, उनीहरुको दुःखेसो छ ।
यस सन्दर्भमा बुझन खोज्दा अस्पताल प्रशासन र सम्बन्धित निकायहरुको फोन उठनै गा¥हो भयो । एकजना फोनमा कुरा गरेपनि नाम नउल्लेख गर्ने सर्तमा आइशोलेसनमा कुल २६ जनाको डयुटी तालिका रहेको बताए । स्वीपर, नर्श र डाक्टर सहित २६ जनाको डयुटी निर्धारण गरिएको बताउदै उनले अनभिज्ञता प्रकट गरेका छन् । तर संक्रमितले भने आफुहरु डाक्टर, नर्श र कर्मचारीको मुख नै नहेरेको बताउछन् । फोन गरि हालखवर सोध्ने वाहेक अरु केहि पनि नरहेको उनीहरुको भनाई छ ।
क्वारेन्टाइनमा परिवारजनको आफनै पिडा
संक्रमितका परिवारजन जो क्वारेन्टाइनमा छन उनीहरुको पनि आफनै पिडा छ । क्वारेन्टाइनमा जनावर सरह व्यवहार हुने गरेको क्वारेन्टाइनवासीहरुको गुनासो छ । जनकपुरधाम उपमहानगरपालिका वडा नम्बर ७ स्थित स्वस्तिक हस्पिटलमा सञ्चालित क्वारेन्टाइन सरकारी मापदण्ड विपरीत रहेको र सरसफाइको कुनै व्यवस्थापन नरहेको क्वारेन्टाइन बसेकी एक महिलाले बताएकी छिन । उनले भनिन– ‘सरकारले कोरोना भाइरसको संक्रमणबाट नागरिकलाई सुरक्षित राख्न शंकास्पद व्यक्तिलाई कम्तिमा १४ देखि १७ दिनसम्म क्वारेन्टाइनमा सुरक्षित तथा व्यवस्थित तरिकाले राख्ने मापदण्ड बनाएको छ तर यहाँ कुनै सुविधा छैन ।
श्रीमान जनकपुरधाम स्थित आइशोलेसनमा रहेको पिडाका बिच आफ्नो ५ बर्षीय र २ बर्षीय दुई बच्चासहित क्वारेन्टाइनमा रहेकी उनले आफुसंग मानवीय व्यवहार नभई जनावर जस्तै व्यवहार भइरहेको आरोप लगाएकी छिन । उनले भनिन, ‘खाना दिइएको छैन बच्चाहरु दूई दिनदेखि घरबाट ल्याएको बिस्कुट र चाउचाउ खाएर बसेका छन् । तिन दिनदेखि यहाँ बसेको छु तर सफाइ कर्मचारीको अहिलेसम्म मुख पनि हेरेको छैन ।’
जेल जस्तो व्यवहार खेप्नु परिरहेको सुनाउँदै उनले तीन दिनमा एक दिन मात्रै खाना दिइएको र खाना पुर्याउन आउने व्यक्ति जनावरलाई जस्तै खाना फालेर भाग्ने गरको दुःखेको व्यक्त गरेकी छन् । क्वारेन्टाइनमा कोठाको व्यवस्थापन गर्दा एउटा खाटदेखि अर्को खाटसम्मको न्युनतम दूरी ३.५ फिट हुनुपर्ने नियम सरकारले तोकेको छ । क्वारेन्टाएनमा बस्नेहरुका लागि स्वास्थ्य, सञ्चार, पानी र विद्युतको व्यावस्था गर्नुपर्ने हुन्छ । तर यहाँ एउटै कोठामा ११ जनालाई एकमिटर भन्दा पनि कम दुरीमा राखिएको उनले दुःखेसो सुनाइन् ।
क्वारेन्टाइनमा बस्नेहरुका लागि बिहान ७ः३० देखि ८ बजेसम्म चिया र खाजा, बिहान ११ः३० देखि १२ बजेसम्म दिवा खाजा, दिउँसो २ः३० बजेदेखि ३ बजेसम्म खाजा र बेलुकी ७ः३० देखि ८ बजेसम्म रात्री खाना व्यवस्था गरिने सरकारी मापदण्डमा तोकिएको छ । खानाको व्यवस्था गर्दा स्थानीय उपलब्धतालाई मध्यनजर गरी स्वस्थ्यकर खानाको प्रबन्ध मिलाउनुपर्ने उल्लेख छ । तर क्वारेन्टाइनमा साँझ बिहान पनि खाने प्रबन्ध नभएको व्याप्त गुनासाहरु क्वारेन्टाईनमा बस्दै आएकाहरुको छ । यस्ता पिडाहरु भोगिरहेका आइसोलेशनका विरामीहरु एउटै स्वरमा भन्छन, ‘यस्तो तनावमय उपचार भन्दा त जहर खाएर मर्नु वेस ।’
