एसपी रिपोर्टर
कठमाण्डौं, बैशाख ३० : नेपालमा एकैदिन थप ५७ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार नयाँ संक्रमित कपिलवस्तु, रुपन्देही, पर्सा, बाराका हुन् । यसअघि सोमवार मात्रै एकैदिन २४ जनामा कोरोना संक्रमण पुष्टि भएको थियो । यससँगै नेपालमा कोरोना संक्रमितको संख्या १ सय ९१ जना पुगेको छ । हालसम्ममा एकै दिन संक्रमित भेटिएको यो अत्यन्तै ठूलो संख्या हो ।
थपिएका संक्रमितमध्ये पर्सामा मात्र ३९ जना रहेका छन् । त्यस्तै कपिलवस्तुका ८, रुपन्देहीका ९ र बाराका १ जना छन् । थपिएका संक्रमित सबै पुरुष रहेको स्वास्थ्य तथा जनसंख्या मन्त्रालयका सहप्रवक्ता डा. समीरकुमार अधिकारीले जानकारी दिए । योसँगै नेपालमा कोरोना संक्रमितको संख्या १ सय ९१ पुगेको छ ।
सरकारले कोरोना संक्रमण न्यूनिकरण तथा रोकथामका लागि भन्दै लकडाउन जारी गरेको आज ५० औं दिन पुगेको छ । पछिल्लो समय सरकारले विभिन्न उद्योग सञ्चालनका लागि अनुमति दिएसँगै लकडाउन केही खुकुलो भएको छ । जसका कारण भीड बढ्न गएको भन्दै पछिल्लो समय संक्रमणको जोखिम झन बढेको विज्ञहरूले बताउँदै आएका छन् ।
