एसपी रिपोर्टर
जनकपुरधाम, बैशाख २६ : कोरोना विरुद्वको लडाईमा विभिन्न संघ संस्थाहरु प्रदेश २ सरकारलाई सहयोग गर्ने क्रम जारी छ । यसै क्रममा सेभ द चिल्ड्रेनले प्रदेश २ सरकारलाई कोरोना भाईरसको संक्रमण नियन्त्रणमा सहयोग पुर्याउने उद्देश्यका साथ २ सय ६३ थान व्यक्तिगत सुरक्षा सामग्री तथा अत्यावश्यक स्वास्थ्य सामग्री प्रदान गरेको छ ।
शुक्रवार समाजिक विकास मन्त्रालयका मन्त्री नवल किशोर साह मार्फत सेभ द चिल्ड्रेनले व्यक्तिगत सुरक्षा सामग्री तथा अत्यावश्यक स्वास्थ्य सामग्री हस्तान्तरण गरेका हुन । सो अवसरमा मन्त्रालयका सचिव डाक्टर रामप्रसाद घिमिरेको समेत उपस्थिती थियो । मन्त्री साहले कोरोना नियन्त्रणमा संघ संस्थाले देखाएको तदारुकता प्रशंसनिय रहेको बताए । यस्ता सहयोगले कोरोनाको संक्रमण रोक्न प्रदेश सरकारले सञ्चालन गरेको सवै अभियानलाई टेवा प्ुग्ने उनको तर्क छ ।
सेभ द चिल्ड्रेनले आफ्नो नियमित र ग्लोबल फण्डको परियोजनाहरुबाट उपलब्ध गराएका व्यक्तिगत सुरक्षा सामग्री विश्व स्वास्थ्य संगठन र नेपाल सरकारले तोकेको मापदण्ड अनुसारको रहेको दाबी गरिएको छ । समानहरु सेभ द चिल्ड्रेनका पुर्वाञ्चल फिल्ड कार्यालयका सह–निर्देशक डाक्टर अजयकान्तले प्रदान गरेका थिए । प्रदेश २ मा कोरोना संक्रमणको बढ्दो संख्या पुष्टी भएसँगै धेरै मानिसहरुमा परिक्षण र उपचारको आवश्यकता भएकाले आफुहरुको प्राथमिकता यस महामारीको नियन्त्रणमा प्रदेश सरकारलाई आवश्यक सहयोग गर्नु रहेको उनले बताए ।
