एसपी रिपोर्टर
जनकपुरधाम, चैत २७ : नेपाल र भारत दुवै देशको नाका सिल रहेको र दुवै देश लकडाउनमा रहेको वेला समाजवादी पार्टीका सांसद प्रदिप यादव सिमापारी पुगेर त्याहाँको कवारेन्टाइन घुमेर फर्किएपछि स्थानियमा त्रास उत्पन्न भएको छ । सीमावर्ती सहर रक्सौलमा क्वारेन्टाइनमा बसेका नेपालीलाई भेट्न गएका कारण सांसद प्रदीप यादवलाई समेत क्वारेन्टाइनमा बस्नु पर्र्ने दबाब आएपछि सरकारले होम क्वारेन्टाइनमा बस्न आग्रह गरेको छ । गृह मन्त्रालयले समाजवादी पार्टीका सांसद यादवलाई क्वारेन्टाइनमा राख्न स्थानीय प्रशासनलाई निर्देशन दिएको बुझिएको छ ।
उनी हालै मात्र भारतीय सीमा क्षेत्रमा नेपालीहरुलाई राखिएको क्वारेन्टाइन स्थल पुगेका थिए । त्यही कारण उनलाई क्वारेन्टाइनमा राख्न भनिएको गृह मन्त्रालय स्रोतले जनाएको छ । पर्साका प्रमुख जिल्ला अधिकारी विष्णुकुमार कार्कीले पनि यादवलाई होम क्वारेन्टाइनमा राखिएको बताए । सांसद यादव सहित क्वारेन्टाइन स्थलमा पुगेका चारै जनालाई होम क्वारेन्टाइनमा राखिएको र निगरानी गरिरहेको सिडिओ कार्कीले बताए । दुवै देश लकडाउनमा रहेको अवस्थामा सांसद सीमापारी गएर आएकोले उनी क्वारेन्टाइनमा बस्नुपर्ने माग चर्को रुपमा उठेको थियो ।
सांसद भारत प्रवेश गरेकोमा नेताहरुको शंका
पूर्वसंविधानसभा सदस्य विचारी यादवले रक्सौल पुगेर आएका सांसदलाई क्वारेन्टाइनमा राख्न माग गरेका छन् ।दुवै देश लकडाउन रहेको समयमा नेपाल भारत आवागमन बन्द रहेकोमा सांसद यादव कसरी भारत पुगे ? कस कसलाई भेटेर आएका छन, क–कसलाई लिएर आएका छन् ?’ प्रश्न गर्दै उनले सांसद यादव नियमाअनुसार १४ दिन क्वारेन्टाइन बस्नुपर्ने मांग गरेका छन् । सांसद यादव, दुई जना स्थानीय पत्रकारसहित ४ जनाको टोली रक्सौल पुगेर त्यहाँ क्वारेन्टाईनमा राखिएका नेपालीलाई भेटेर फर्केका थिए । सांसद यादवसहित रक्सौल पुगेर आएका ४ जना १४ दिनसम्म बाहिर निस्कन नपाउने प्रजिअ कार्कीको भनाइ छ ।
लकडाउनका कारण सिमापारी रोकिएका नेपालीको अवस्था बुझ्न बुधबार रक्सौल गएको सांसद यादवले स्वीकार गरेका छन् । सांसद यादवले क्वारेन्टाइनमा रहेकालाई सेनिटाइजर, मास्क, फलफूल, चिउरा, बिस्कुट, बिकाजी भुजिया, जुस र खानेपानी लगायत सामग्री समेत वितरण गरेर आएको बताए ।
सांसद यादवले आफु सांसद रहेकाले भारतमा रहेको नेपालीहरुको विषयमा सरकार जस्तै आफुहरुलाई समेत चिन्ता रहेको र आफुहरु उनीहरुको अवस्था बुझ्नका लागि विश्व स्वास्थ्य संगठनले बनाएको मापदण्ड पालना गरेर भेटेर आएको बताए । होम क्वारेन्टाइनमा बस्न प्रशासनले आफूलाई आग्रह गरेको बताउँदै उनले त्यसका बारेमा सोच्न बाँकी नै रहेको बताए । मैले संक्रमितलाई भेटेर आएको हैन भन्दै सांसद यादवले उनीहरु १३ दिनदेखि क्वारेन्टाइनमा रहेको र कुनै लक्षण नदेखिएको बताए । उनले यस्तो वेला पनि आफु विरुद्व राजनिति भएको आरोप लगाए । रक्सोलस्थित हजारी मल उच्च माध्यमिक बिद्यालयमा त्यहाँको स्थानीय प्रशासनले क्वारेन्टाइन स्थापना गरेको छ । क्वारेन्टाइनमा रहेका २५ जना मध्ये १६ जना नेपाली छन् । उनीहरुलाई रक्सौलमा स्थानीय प्रशासनले बस्ने, खाने, नियमित स्वास्थ्य जाँच लगायतको सुविधा उपलब्ध गराएको छ । प्रत्येकलाई विछ्यौना सहितको खाट, ओढ्ने र झुलसहित बिहान बेलुका खानाको समेत राम्रो प्रबन्ध रहेको क्वारेन्टाइनमा रहेको नेपालीले बताएका छन् ।
