एसपी रिपोर्टर
काठमाण्डौं, जेठ १९ : आज जेठ १९ गते । २०५८ साल आजकै दिन राजदरवारमा हत्या काण्ड हुँदा तत्कालिन राजा विरेन्द्रका सम्पुर्ण पारिवारिक सदस्य मारिएका थिए । आज स्वर्गीय राजा विरेन्द्र शाहको स–परिवारलाई श्रद्धाञ्जली दिदै आजकै दिन राष्ट्रिय जनतान्त्रिक गठबन्धनको विस्तार गरिएको छ । डा. मनोज मुक्ति ‘विवेक’ को पहलमा गठित गठबन्धनमा रामचन्द्र बानियाँ क्षेत्री नेतृत्वको नेपाल डेमोक्रेटिक पार्टी पनि सामेल भएको छ ।
केही दिन पुर्व जनतान्त्रिक तराई मुक्ति मोर्चा र राष्ट्रिय प्रजातन्त्र पार्टी (लोकतान्त्रिक) मिलेर राष्ट्रिय जनतान्त्रिक गठबन्धनको घोषणा गरेका थिए । अब संगठनले आफ्नो ७७ वटै जिल्लामा जबर्दस्त उपस्थिति रहने दावी समेत गरेको छ । एमसीसी खारेजी, गणतन्त्र र धर्म निर्पेक्षता खारेजी तथा हिन्दु राष्ट्र सहित राजसंस्था पुर्नस्थापना लगायतको विविध राजनीतिक मागहरू अघि सार्दै चरणबद्ध आन्दोलनका कार्यक्रम समेत गठबन्धनले घोषणा पनि गरिएको छ ।
गठबन्धनद्वारा राष्ट्र बचाउ अभियानको पनि राष्ट्रब्यापी रुपमा संचालन गरिएको र त्यस क्रममा उक्त अभियानमा व्यापक जन–समर्थन पनि प्राप्त भईरहेको गठबन्धनको भनाई छ । जनतान्त्रिक तराई मुक्ति मोर्चाका राष्ट्रिय अध्यक्ष डा. मुक्तिले सबै शोषित, अपहेलित, शासित, उपेक्षित वर्ग समुदाय क्षेत्रका आम मुक्तिकामी जनसमुदायलाई एकजुट हुन अपील पनि गरेका छन् ।
नेपाल र नेपालीको अस्तित्व बचाउनका लागि अहिलेका भ्रष्ट, देश बेचुवा, आत्मसमर्पणवादी, लम्पसारवादी, लूटतान्त्रिक ब्यावस्था र शासन सत्तालाई अपदस्त गर्नैपर्ने डा. मुक्तिले बताए । ‘नेपालमा पूर्ण जनतान्त्रिक शासन ब्यवस्था स्थापित गर्नैपर्ने आवयश्कता रहेको र यस महान कार्यमा सम्पूर्ण आम नेपालीलाई एकजुट भएर लडनै पर्ने देखिन्छ’ उनले भने, ‘किनभने यो राष्ट्र, राष्ट्रियता, पहिचान, धर्म, संस्कृति बचाउने लडाई हो ।
