एसपी रिपोर्टर
जनकपुरधाम, असार ९ : कपाल काटने पेशारत प्रदेश २ का नाईहरुले २४ घण्टा भित्र आफुहरुको माग सम्बोधन नभए प्रदेशभरिका सैलुनहरु खोल्ने चेतावनी दिएका छन । नेपाल नाई संघ प्रदेश २ को अगुवाईमा सैलुन सञ्चालकहरु आफनो ज्ञापन पत्रको मांग पुरा नभएको भन्दै जुलुस प्रदर्शन गर्दै मुख्यमन्त्री तथा मन्त्रिपरिषद कार्यालय पुगेर मुख्यमन्त्री लालबाबु राउतलाई आफना मांगहरु स्मरण गराउन पुनः स्मरण पत्र बुझाएका छन ।
कोरोना महामारीका कारण जारी भएको लकडाउनले गर्दा लामो समयदेखि आफुहरुको व्यापार व्यवसाय बन्द भएको भन्दै सैलुन खोल्ने वातावरण मिलाइदिन उनीहरुले गत जेठ २७ गते नै प्रदेश २ का मुख्यमन्त्री लालबाबु राउतलाई ज्ञापनपत्र बुझाएका थिए । तर अहिलेसम्म पनि सरकारले आफुहरुको पीडालाई नबुझेकोले बाध्य भएर सैलुन खोल्न लागेको नेपाल नाई संघ प्रदेश २ का अध्यक्ष चन्देश्वर ठाकुरले बताए ।
ठाकुरले लकडाउनका कारण प्रदेशभरिका ३ हजार नाई श्रमिकहरुको व्यवसाय धरापमा परेको र उनीहरुलाई आफ्नो परिवारको खर्च जुटाउन समेत समस्या भइरहेको गुनासो गरे । सरकारले गत चैत ११ गतेदेखि लकडाउन गरेको थियो तर अहिले अन्य व्यवसायीको हकमा लकडाउन खुकुलो बनाइए पनि सैलुन खोल्नमा प्रतिबन्ध लगाइएपछि नाई संघसँग आबद्ध सैलुन संचालकहरु सैलुन खोल्न मांग गर्दै आएका छन ।
सैलुन संचालकहरुले आफुहरुको लकडाउन अवधिभरको कोठा भाडा र पसल भाडा छुट हुनुपर्ने, बैंक तथा सहकारी संस्थाबाट लिएको नाई श्रमिकहरुको ऋणको ब्याज मिनाहा हुनुपर्ने, नाई श्रमिकहरुलाई राहतको व्यवस्था हुनुपर्ने लगायतका मांग गर्दै आएका छन् ।
