एजेन्सी
भदौ ६ : विश्व स्वास्थ्य संगठनका प्रमुख टेड्रोस घेब्रेयससले कोरोना भाइरसको महामारी दुई वर्षभित्र अन्त हुने विश्वास लिएका छन् । उनले यसअघि यो महामारी कहिल्यै अन्त नहुने भनी दिएको अभिव्यक्तिभन्दा यसपटक फरक भनाई सार्वजनिक भएको छ ।
शुक्रबार जेनेभामा बोल्दै घेब्रेयससले दुई वर्षभित्र नै महामारी अन्त हुने विश्वास लिने क्रममा स्पेनिस फ्लुको उदाहरण दिएका थिए । सन् १९१८ मा देखिएको उक्त महामारी दुई वर्षमा अन्त भएको थियो । अहिलेको प्रभावकारी प्रविधिले दुई वर्ष पनि नलाग्ने उनको विश्वास रहेको छ ।
डब्लुएचओ प्रमुखले कोरोना भाइरसको तिथि तोकेर अन्त हुने विश्वास गरिरहँदा सँसारभर कोभिड १९ को भ्याक्सिन धमाधम विकास भइरहेको छ । रुसले भ्याक्सिन विकास गरेर दर्ता गरिसकेको छ । अमेरिका, युरोप, चीन, भारतलगायतका देशहरु भ्याक्सिन परीक्षणका क्रममा छन् । यसैलाई दृष्टिगत गरी उनको पछिल्लो भनाई आएको देखिन्छ ।
घेब्रेयससले विगतमा भ्याक्सिन जादुरको छडी हुन नसक्ने अभिव्यक्ति दिएका थिए । उनले भ्याक्सिन आएपछि महामारी अन्त हुनेमा ढुक्क नहुन भनेका थिए । यतिसम्मकी संक्रमण कहिल्यै अन्त नहुने भनेपछि त्रास बढेको थियो ।
डब्लुएचओको गतिविधि बेला बेलामा विवादमा पर्ने गरेको छ । अमेरिकी राष्ट्रपति डोनाल्ड ट्रम्पले डब्लुएचओसँगको सम्बन्ध रद्द नै गरेका छन् । उनले डब्लुएचओमाथि चीनको स्वार्थ अनुसार चलेको आरोप समेत लगाए । दिदै आएको फन्ड नै रोकिदिएका छन् ।
एकातर्फ डब्लुएचओ विवादमा पर्न थालेको छ । अर्कोतर्फ डब्लुएचओका प्रमुख घेब्रेयससको कोभिड १९ महामारीबारे विपरित भनाईहरु सार्वजनिक भइरहेका छन् ।
जे सुकै भएपनि कोरोना महामारी दुई वर्षभित्र अन्त हुने विश्वाससहितको भनाई सार्वजनिक हुनु अर्थपूर्ण छ । यसले विश्वमा नयाँ आशा जागेको छ । विश्वभर एक सय ६० भन्दा बढी भ्याक्सिन विकास भइरहेको, २५ वटा मानव परीक्षणका क्रममा रहेको र तीनवटा तेस्रो चरणको मानव परीक्षणमा रहेकाले नयाँ आशा जागेको छ । वैज्ञानिक आविष्कार र अनुसन्धानले विश्वमा कोरोनामाथि जीत हासिल गर्ने संकेतहरु देखिएको छ ।
अहिलेकै गतिमा भ्याक्सिन विकासमा गम्भीरता हासिल भई सफलता प्राप्त भएमा सन् २०२१ भित्र विश्वबाट कोरोना भाइरसको महामारी अन्त हुनसक्छ । विश्वका पाँच कम्पनि भ्याक्सिन विकासमा सफलतातर्फ पुगेका छन् । उनीहरुले यसै वर्ष उत्पादन शुरु गरी प्रयोग गर्ने तय भइसकेको छ । रुसी भ्याक्सिन आउँदो हप्ताबाट विश्वका विभिन्न देशमा समेत प्रयोग हुँदैछ । भ्याक्सिनको पहुँच विश्वभर सुनिश्चित गर्ने तत्परता समेत देखाइएको छ । यसरी अब महामारी अन्तको संकेतहरु देखिन थालेको छ ।
मानवले जस्तोसुकै चुनौतीको पनि डटेर सामना गर्ने र आफ्नो अस्तित्वको रक्षा गरिरहने सन्देश यसपटक प्रवाह हुने देखिदैछ । सँसार पुरानै लयमा फर्कने र आर्थिक तथा सामाजिक जीवन चलायमान हुने संकेतहरु देखिन थालेको छ ।
