एसपी रिपोर्टर
जनकपुरधाम, साउन २८ : महोत्तरीमा कोरोना सँक्रमणबाट थप एक जनाको मृत्यु भएको छ । जिल्लाको मठियानी नगरपालिका वार्ड नं ६ का एक जना ४५ बर्षिय पुरुषको मृत्यु भएको हो । मधुमेह र फोक्सोका रोगी रहेका उक्त पुरुषको उपचारको क्रममा २ दिन पहिला जनकपुरको जानकी हेल्थ केयरमा मृत्यु भएको थियो । उपचारकै क्रममा उनको स्वाब लिइ जाँचको लागि प्रयोगशालामा पठाएको थियो । हिजो मँगलबार महोत्तरीमा ११ जना सँक्रमित पाएकोमा उक्त व्यक्तिको समेत रिपोर्ट पोजेटिभ आएको छ ।
यता मृत्कको दाहासँस्कारमा गएका करिब ५० जना भन्दा बढी व्यक्तिहरुलाई होमक्वारेन्टीनमा बस्न आग्रह गरिएको छ भने मठियानीको बजार क्षेत्र र वार्ड नं ६ पुर्ण रुपमा सिल गरिएको जिल्ला प्रशासन कार्यालय महोत्तरीले जनाएको छ । यो सँगै महोत्तरीमा मृत्कको सँख्या २ पुगेको छ ।
सप्तरीमा पनि एकको एम्बुलेन्समै मृत्यु
सप्तरीमा थप एक जना कोरोना संक्रमितको मृत्यु भएको छ । योसँगै सप्तरीमा कोरोना संक्रमित भएर मृत्यु हुनेको संख्या तीन पुगेको छ । पछिल्लो पटक मंगलबार राति जिल्लाको डाक्नेश्वरी नगरपालिका वडा नम्बर ८ घर भई राजविराज ६ स्थित सिरहा रोड बस्दै आएका ८० वर्षीय वृद्धको मृत्यु भएको जिल्ला स्वास्थ्य कार्यालयले जनाएको छ ।
उनलाई चार दिनअघि ज्वरो आएको थियो । ज्वरो आउँदा उनले स्वाब परीक्षण गर्न दिएका थिए । मंगलबार राति रिपोर्ट पोजेटिभ आएपछि उनलाई आइसोलेसनमा ल्याउन एम्बुलेन्स पुगेको थियो । एम्बुलेन्समा चढेलगत्तै उनको मृत्यु भएको स्वास्थ्य कार्यालयका एक कर्मचारीले बताए । उनी यसअघि मुटु सम्बन्धी रोगी थिए भने थाइराइड, सुगर, उच्च रक्तचापबाट समेत पीडित थिए ।
यसअघि जिल्लाको रुपनी गाउँपालिका ५ गढियाका ४५ वर्षीय पुरुष र सदरमुकाम राजविराज ६ निवासी ७२ वर्षीय वृद्धमा कोरोना संक्रमण भएर मृत्यु भएको थियो । वृद्धको गत साउन १ गते र ४५ वर्षीय पुरुषको गत १९ साउनमा मृत्यु भएको थियो । हालसम्म देशभर कोरोना संक्रमणबाट ८४ जनाले ज्यान गुमाएका छन् ।
