एसपी रिपोर्टर
जनकपुरधाम, साउन १३ : जनकपुरधाम उप–महानगरपालिकाकाले दलितहरुको व्यवस्थापन नगरी उठिबास गराएको भन्दै उनी विरुद्ध जिल्ला अदालतमा मुद्दा दर्ता हुने भएको छ । दलित अगुवाहरुले शुक्रबार मेयर लालकिशोर साह र उपप्रमुख रिता झा विरुद्ध जिल्ला अदालत धनुषामा मुद्दा दर्ता गराउने अधिवक्ता दीपक विश्वकर्माले जनाएका छन् । जनकपुरधाम उप–महानगरपालिका १ स्थित धर्मवान टोलमा मेयर साहले डोजर लगाएर दलित बस्ती हटाएका थिए । सुकुम्वासी दलितहरुलाई बासको व्यवस्था नगरी हटाइएकोमा दलितहरु आक्रोसित हुँदै आएका छन् ।

दलित संघर्ष समितिका संयोजक चन्देश्वर दासले दलित विरोधी देखिएका जउनपा विरुद्ध मुद्दा गर्ने जनाउँदै दलितहरुको बासको व्यवस्थापन नभए नगरपालिका कार्यालयभित्रै टेन्ट लगाएर दलितहरुलाई बसाउने तयारी भएको बताए । चरम भ्रष्टाचारमा डुबेका जउनपाले सडक बनाउने ठेक्केदारहरुसँग कमिसन लिएर हतारहतारमा दलित बस्ती खाली गराएको उनको आरोप रहेको छ ।

सोमबार दलित अगुवाहरुले छलफल गरी जउनपा विरुद्ध संघर्षमा जाने संयुक्त निर्णयसमेत गरेका छन् जस्का लागि पाँच सदस्यीय नगर विस्तार संघर्ष समिति गठन गरेको छ भने तीन दिनभित्रमा धर्मवान संघर्ष समिति गठन गर्ने र ती समितिले घर–टहरा भत्काएको परिवारलाई जनकपुरधाम उपमहानगरपालिका कार्यालय भित्र टेन्टमा बसाउनेछ । नगर विस्तार समितिले उपमहानगरविरुद्ध मुद्दा दायर गर्नुका साथै प्रदेश सरकार तथा जिल्ला प्रशासन कार्यालय मार्फत संघीय सरकारलाई ज्ञापनपत्र समेत बुझाउने कार्यक्रम रहेको दासले बताए । यस विषयमा मेयरसंग कुरा गर्न चाहँदा उनले फोन उठाएन ।