एसपी रिपोर्टर
जनकपुरधाम, असोज ९ : देशमा चिनिया अतिक्रमण विरुद्वको स्वर बुलन्द हुदै गएको छ । पछिल्लो समय नेपाली भूमिको अतिक्रमण भएको भन्दै युवा नेपाल समिति प्रदेश २ ले जनकपुरधाममा बिरोध प्रदर्शन गरेको छ । चीनले नेपाली भूमि अतिक्रमण गरेको भन्दै चाइनीज अतिक्रमण बिरुद्ध युवा नेपाल समितिले बिरोध प्रदर्शन गरेको हो । युवाहरुको समूहले चाइनीज अतिक्रमण बिरुद्ध निकालेको बिरोध जुलुस निकाल्दै नेपाली राष्ट्रिय झन्डा सहित प्रदर्शन गरयो । जनकपुरधामको रामानन्दचोकवाट शुरु भई जनक चोकमा पुगेर जुलुश कोणसभामा परिणत भएको थियो ।
समिति प्रदेश २ का अध्यक्ष मोहन सिंहको नेतृत्वमा निस्केको बिरोध रैलीमा युवाहरुले ब्याक अफ चाइना, चिनिया अतिक्रमण बन्द गर, मिचिएको नेपाली भूमि फिर्ता गर, चाइनिज सम्राज्य मुर्दावाद सहितका नारा लगाएका थिए । युवाहरुले परराष्ट्र मन्त्री प्रदीप ज्ञवाली बिरुद्ध समेत नारा लगाएका थिए । कोणसभामा नेपाली कांग्रेसको भातृ संगठन तरुण दल धनुषाका उपाध्यक्ष राकेश बिक्रम साहले चाइनिज अतिक्रमण बिरुद्ध नेपाल सरकार समेत मौन रहेको समयमा चाइनिज सम्राज्यवाद बिरुद्ध आफूहरु बिरोध प्रदर्शन गर्न बाध्य हुनुपरेको बताए ।
युवा गुडडु पाण्डेले नेपाली भूमिको अतिक्रमण आफूहरुका लागि सह्य नरहेको बताए । उनले भारत तर्फ बाट होस वा चिन तर्फबाट नेपाली भूमिको अतिक्रमण बिरुद्ध आवाज उठाउन हामी सदैव तयार रहेको बताए । अर्का युवा सुशिल कर्णले नेपाली भूमि अतिक्रमण भइरहँदा समेत सरकारले त्यसको बिरोध गर्नुको साटो उल्टै भुमि कब्जा नभएको भन्नु लज्जास्पद रहेको बताए । केही दिन अगाडी मात्रै नेपालको हुम्ला स्थित ल्याप्चामा चीनले निर्माण कार्य गरिरहेको सार्वजानिक भएको थियो । एता नेपाल सरकारले नेपाली भूमिमा चीनको तर्फबाट कुनै अतिक्रमण नभएको परराष्ट्र मन्त्री प्रदीप ज्ञवाली मार्फत आधिकारिक धारणा वाहिर ल्याइ सकेको छ ।
