पुरन रौनियार
जनकपुरधाम, असोज २२ : करिव साढे छ महिना पछि बल्ल खुलेको धनुषा र केन्द्र जनकपुरधामको विद्यालयहरु खुल्न नपाउदै पुनः विवाद उत्पन्न भएको छ । महामारी बढदै गर्दा दशैंको मुखमा धमाधम विद्यालय खोल्नुलाई अभिभावकले शुल्क उठाउने वाहाना, वार्ड अध्यक्षहरुले कमिसनको खेल बुझेका छन भने सिडिओ पनि असन्तुष्ट देखिएका छन् ।
करिव साढे छ महिना देखि बन्द रहेको विद्यालय महामारी र मृत्युदर बढदै जाँदा चाडपर्वकै मुखमा आएर धमाधम खोल्न थालिएपछि अभिभावक शंसकित छन् । खतरा बढदै गएकावेला विद्यालय खोल्नुलाई चाडपर्वको वेला पैसा असुल्ने योजनाका रुपमा बुझेका छन यहाँका अभिभावकहरु । अधिकांश अभिभावक अहिलेको अवस्थामा बच्चालाई विद्यालय पठाउन चाहिरहेका छैनन । तर विद्यालयवाट फोन गरेर वाँकी वक्यौता बुझाएर विद्यार्थी पठाउन आग्रह भइरहेको छ ।
अभिभावक मात्र होइन जनकपुरधाम उपमहानगरपालिकाको सो निर्णय वडा अध्यक्षहरुलाई नै पचेको छैन । प्यावसन, एनप्यावसनको तबाब र विद्यालयहरुको प्रलोभनमा परि उपमहानगरपालिकाकाको नेतृत्वले विद्यालय खोल्ने निर्णय गरेको २५ मध्ये आधा दर्जन वडा अध्यक्षहरुको आरोप छ ।
वडा अध्यक्षहरुले विद्यालयहरुसंग पैसा उठाएर सञ्चालनको निर्णय भएको आफुहरुसंग सोधपुछ नभएको भन्दै शंका गरिरहेका छन् । उपमहानगरपालिकाको निर्णय प्रमुख जिल्ला अधिकारी प्रेम प्रसाद भट्टराईलाई पनि चित बुझेको छैन । यद्यपि मापदण्ड पुरा गरि विद्यालय सञ्चालनको जिम्मा स्थानिय सरकारलाई रहेकाले विद्यालय खोल्न पाउने भन्दै सिडिओ भट्टराईले मापदण्ड नअपनाइएको भए विद्यालयमा ताला हान्ने जिम्मा फेरी आफुहरुको रहेको चेतावनी दिन्छन् ।
सिडिओ भट्टराईको सोहि चेतावनीका कारण कतिपय विद्यालयहरु अझै विद्यालय खोल्न सकेका छैनन । एता उपमहानगरपालिकाको शिक्षा शाखा प्रमुख अञ्जु पाण्डेले अनुगमणको क्रममा सिडिओ साहेव संग समेत छलफल गरेर सो निर्णय भएको दावी गर्छिन। निजि विद्यालयका संगठनहरु शिक्षाको महत्व र प्रभावलाई बुझेर नै संघिय सरकारको मन्त्री स्तरीय निर्देशिका बमोजिम मापदण्ड अनुसार विद्यालय खोल्ने निर्णय भएकोमा शंका नगर्न आग्रह गरिरहेका छन् ।
प्यावसन धनुषाका अध्यक्ष डिएन पाण्डेले कुनै पनि कुरा काला चस्मा लगाएर हेरिए कालो नै देखिने भन्दै शिक्षाको महत्व र अनावयश्क घरमा रहेको बच्चामा पर्ने असरको बारेमा चिन्तनशिल हुन आग्रह गरेका छन् । कोरोनाको परिक्षण नै नहुने भएकाले डर र भयको त्रास कम रहेको यस क्षेत्रमा बल्ल खुलेको विद्यालयमा पनि विभिन्न कारण अवरोध उत्पन्न हुने वातावरण बन्दै गएको छ ।
