एसपी रिपोर्टर
जनकपुरधाम, साउन २० : सोमवार मध्यरात देखि पुनः निषेधाज्ञा जारी भएपछि जनकपुरधाम बजार शुनसान देखिएको छ । विहान १० बजे सम्म दैनिक उपभोग्य, औषधी सहितका अति आवयश्क सेवा दिने पसलहरु खुल्ला रहेकाले केहि चहलपहल देखिएपनि त्यसपछि भने जनकपुरधामको मुख्य सडकहरु सुनसान नै देखिएका छन् ।
फाटफुट पैदलयात्री र विरामी तथा अति आवयश्क प्रयोजनमा प्रयोग हुने सवारीसाधन वाहेक कुनै पनि सेवा प्रवाह हुन सकेको छैन । १० बजे पछि त बजार नै सुनसान देखिन्छ । यहाँका वितिय संस्था, प्रदेश मुख्यालय, अस्पताल, न्यायलय तथा सुरक्षाकर्मीहरुमा समेत संक्रमण पुष्टी हुन थालेपछि प्रशासनले तत्काल सोमवार मध्यरात १२ बजे देखि अगामि आइतवार मध्यरात १२ सम्म सात दिनका लागि निषेधाज्ञा जारी गरेको छ ।
सोमवार मात्र जनकपुरधाम स्थित मुख्यमन्त्री कार्यालयका कर्मचारी, प्रादेशिक अस्पतालका चिकित्सक र कर्मचारी तथा वितिय संस्थाका कर्मचारी गरि एकै दिन ३० जनामा संक्रमण देखिएपछि समुदाय स्तरमा संक्रमणको त्रास बढेको छ । तरपनि परिक्षणको समुचित व्यवस्था हुन नसक्दा स्थानिय घरमा लुक्न वाहेक कुनै विकल्प नरहेको बताउछन् ।
प्रादेशिक अस्पतालका चिकित्सक र कर्मचारीमा संक्रमण देखिएपछि भागाभाग भएको छ । विरामीलाई उपचार पाउन हम्मे परिररहेको छ । निजि क्लिनीक सञ्चालन गरेका चिकित्सकहरु पुनः भय त्रासका कारण सेवा दिन छाडेका छन् । फाटफुट औषधी पसलहरु मात्र खुलेको र उनीहरुले नै प्राथमिक उपचार गरिरहेको अवस्था छ ।
