एसपी रिपोर्टर
जनकपुरधाम, जेठ ८ : भनिन्छ कोरोना शरिरमा भन्दा पनि दिमागमा प्रहार गर्ने रोग हो । जस्को आत्मवल मजबुत छ उ कोरोनासंग जित्ने गरेका छन् । त्यसैकारण जनकपुरधामको गोपाल धर्मशालामा सञ्चालित क्वारेन्टाइनमा जनकपुरधाम उप–महानगरपालिकाका मेयर लाल किशोर साह आज एका विहानै पुगेर क्वारेन्टाइन भएका व्यक्तिहरुलाई हौसला प्रदान गरेका छन् ।
क्वारेन्टाइनमा बुधवार देखि योग अभ्यास समेत सुरु भएको छ । विहानै योगगुरुहरु क्वारेन्टाइन भएका व्यक्तिहरुलाई दैनिक विहान विहान योग गराउन थालेका छन् । योग अभ्यास र साधनावाट कतेकौ रोगहरुवाट लड्न सकिने र निको पनि हुने भएकाले योग सुरु गरिएको हो । मेयर साहले योग गुरुहरुको समेत प्रशंसा गरेका छन् । योग गुरुहरु आफ्नो अमुल्य जिवनलाई जोखिममा राखेर क्वारेन्टाइनमा भएकाहरुको शारिरिक र मानसिक क्षमता विकास गर्ने काम गरिरहेकोमा उनले धन्यवाद दिएका छन् ।
‘कोरोनाकोे कुनै उपचार नभएकाले यो शरिर भन्दा पनि दिमागमा प्रहार गर्छ, त्यसैले मजबुत आत्मवल आवयश्क छ ।’
क्वारेन्टाइनमा तीनवटा जेनरेशन हजुर बा, बुवा र छोरा समेत रहेको बताउदै मेयर साहले अहिलेको परिस्थितीसंग जित्ने सके भविष्य उज्जवल रहेको बताए । उनले क्वारेन्टाइनमा रहेका व्यक्तिहरु संग कुनै समस्या भए तुरन्त खवर गर्न आग्रह गरेका थिए । खानपिन तथा अन्य दैनिक उपभोग्यका सामग्रीहरुको कुनै अभाव र समस्या भने भन्नुहोला, मेयर साहले भने, ‘हामी सक्दो यहाँहरुको समस्या समाधान गर्छौ गर्न लगाउँछौं ।’ योग सुरु गर्न योगदान दिएका जनकपुरधाम वडा नं. ४ का वडाध्यक्ष सुदर्शन सिंह, योग गुरुहरु विमल जी र राम सेवक मण्डललाई समेत उनले धन्यवाद दिएका छन् ।
उनले जनकपुरधामका पत्रकार र पुस्तक व्यवसायीको परिवारका सदस्यहरुको रिपोर्ट निगेटिभ आएको जानकारी दिदैँ जनकपुरधामको कोरेन्टाइनवासीको रिपोर्ट निगेटिभ आउनुमा माता जानकी जीको कृपा रहेको र एक महिना देखि मुस्लिम दाजुभाईहरु समेत रमजानको तपस्यामा रहेकाले हिन्दु मुस्लिम मिलेर कोरोनालाई लखेटेर भगाउने बताए ।
