एसपी रिपोर्टर
जनकपुरधाम, जेठ ६ : प्रदेशमा कोरोना संक्रमितको चाप बढन थाले पछि प्रदेश सरकारले ३ सय ५ आइसोलेशन बेड थप्ने निर्णय गरेको छ । मुख्यमन्त्री लालबाबु राउतको नेतृत्वमा रहेको कोरोना भाइरस रोकथाम तथा नियन्त्रण प्रदेश स्तरीय निर्देशन एवं समन्वय समितिको आज सम्पन्न बैठकले कोरोना संक्रमितहरुको संख्या बढने सम्भावना लाई दृष्टिगत गर्दै प्रदेशको विभिन्न स्थानमा गरि ३ सय ५ आइसोलेशन बेड थप्ने निर्णय गरेको छ ।
हाल संचालनमा रहेको कोरोना अस्पतालको आइसोलेशन बेडका अतिरिक्त सिरहा अस्पतालमा ५० बेड , सिरहा अस्पतालको मातहतमा रहने गरि महेन्द्र गेनाइ अस्पतालमा ३० बेड, गौर अस्पतालको मातहतमा रहने गरि गौर नरसिंह इन्स्टिच्युटमा ३० बेड, पोखरिया अस्पताल पर्सामा २५ बेड, भारदह अस्पतालमा सप्तरीमा ५० बेड, मलंगवा अस्पतालको मातहतमा रहने गरि अन्त अल्पमाई रामनारायणयादव नर्सिंग कलेजमा २५ बेड, गजेन्द्र नारायण सिंह अस्पताल राजविराजको मातहतमा रहने गरि साइकृष्ण मेडिकल हातामा ५० बेड र बर्दीवास अस्पतालमा ५० बेड थप गर्ने निर्णय गरेको छ ।
बैठकले आर टी पिसिआर ल्याब स्थापना तथा संचालनका लागि आवश्यक सुझाव सल्लाह, प्राविधिक सहयोग र समन्वय तथा सहजीकरणका लागि राष्ट्रिय जनस्वास्थ्य प्रयोगशाला काठमाडौका पूर्व निर्देशक डा. राजकुमार महतोलाई विज्ञ सल्लाहकारमा नियुक्त गर्ने निर्णय समेत गरेको छ । बैठकले प्रदेशमा जारी कोरोना परीक्षणको कार्यलाई थप प्रभावकारी बनाउन सम्बन्धित पक्षलाई निर्देशन दिने एवं आइसोलेशन तथा क्वारेन्टाइनमा रहेका संक्रमित एवं शंकास्पदहरुको खाना तथा खाजाको प्रदेश स्तरीय एउटै मापदण्ड बनाएर उपलब्ध गराउने निर्णय समेत गरेको छ ।
बैठकले बिरगञ्जमा होल्डिङ्ग क्वारेन्टाइन को निर्माणको लागि स्थानिय सरोकार बलाहरु सङ्ग समन्वय गर्ने, नारायणी अस्पतालमा उपचाररत रहेकाहरू को खाना र खाजा प्रदेश सरकारको मापदण्ड अनुरुप उपलब्ध गराउने , नारायणी मा सञ्चालन मा रहेको पिसिआर परिक्षण लाई प्रभावकारी बनाउन थप भिटिएम उपलब्ध गराउने निर्णय समेत गरेको छ । बैठकले नारायणी अस्पतालमा पुर्बाधार लागायतका अन्य तयारी को लागि माङ्ग अनुसार को रकम उपलब्ध गराउने निर्णय समेत गरेको छ ।
प्रदेश राहत कोषमा स्वरोजगार लघुवितको सहयोग
कोरोना महामारी नियन्त्रण, रोकथाम तथा उपचारको लागि प्रदेश सरकारले स्थापना गरेको राहत कोषमा स्वरोजगार लघुवित वितिय संस्थाले सहयोग गरेको छ । स्वरोजगार लघुवित वितिय संस्थाले प्रदेश राहतकोषमा एक लाखको सहयोग गरेका छन । संस्थाका जनकपुर स्थित प्रतिनिधिहरुले आज मुख्यमन्त्री लालबाबु राउतलाई एक लाख बराबरको चेक हस्तान्तरण गरेका हुन ।
प्रदेश राहत कोषमा प्रदेशमा शाखा संचालन गर्दै आएका प्रायः बैंकहरुले सहयोग गरेका छन भने केही समाजिक संस्था र उद्योगपतिहरुले समेत सहयोग गरेका छन । राहत कोषको रकम प्रदेशमा महामारी नियन्त्रणका लागि खर्च गरिने प्रदेश सरकारले घोषणा गरेका छन ।
