एसपी रिपोर्टर
जनकपुरधाम, बैशाख ३१ : धनुषाको दुई, महोतरीको दुई र सर्लाहीमा एकजना गरि जनकपुरधाम प्रादेशिक अस्पतालमा पाँचजनालाई आइसोलेट गरिएको छ । महोतरीको दुई मध्ये एकजना भने जनकपुरधाममा पुस्तक व्यवसायी सञ्चालन गर्दै आएका व्यक्ति हुन । उनीहरुमा कोरोना पोजेटिभ पाइएको छ । यद्यपि उनीहरुमा कुनै समस्या भने नरहेको चिकित्सकहरु बताउछन् ।
जनकपुरधाम उप–महानगरपालिकाको ४०, ३५ वर्षीय पुरुष दुई र मिथिला नगरपालिका १० लालगढकी २५ वर्षीया एक महिला गरी धुनषामै बस्ने तीनजना र महोतरीमा समेत एकजनामा कोरोना देखिएपछि दुवै जिल्लामा त्रास बढेको छ । जनकपुरधामको दुई पुरुष मध्ये ४० वर्षीय पुरुष पत्रकार हुन् । जनकपुरधाममा गत बुधबार गरिएको स्वाब परीक्षणमा उनीहरुको नेगेटिभ रिर्पोट आएको थियो । तर सोही स्वाबलाई काठमाडौंस्थित राष्ट्रिय जनस्वास्थ्य प्रयोगशाला टेकुमा जाँच गर्दा पोजिटिभ रिपोर्ट आएको छ । स्वास्थ्य तथा जनसंख्या मन्त्रालयले मंगलबार राति धनुषाका २ जना र महोत्तरीका २ जना संक्रमित भएको जनाएको थियो । तर महोत्तरीका भनिएका एक व्यक्ति लामो समयदेखि जनकपुरधाममै बसोबास गर्दै आएको पाइएको धनुषाका प्रमुख जिल्ला अधिकारी कोषहरि निरौलाले जानकारी दिए ।
जनकपुरधाम उप–महानगरपालिका ४ स्थित पुस्तक पसल सञ्चालन गर्दै आएका महोत्तरी जलेश्वर नगरपालिका ३ स्थायी घर भएका अर्का व्यक्ति हुन । उनी लकडाउन खुकुलो हुदैजाँदा एकआध घण्टा पुस्तक पसल खोलेको बताउछन् । यसैगरी मिथिला नगरपालिका १० लालगढकी २५ वर्षीया महिला चैत १ गते भारतबाट नेपाल आएकी थिइन् । श्रीमान् र बच्चासँगै उनी घरमै सेल्फ क्वारेन्टाइनमा रहेकी थिइन् । उनीसँगै आएका श्रीमान र बच्चाको रिपोर्ट भने नेगेटिभ आएको मिथिला नगरपालिकाका मेयर हरिनारायण महतोले जानकारी दिए ।
तीनैजनालाई प्रादेशिक अस्पताल जनकपुरमा ल्याइ आइसोलेसनमा राखिएको छ । उनीहरु बस्दै आएको टोल सिल गर्न लागिएको धनुषाका प्रमुख जिल्ला अधिकारी कोषहरी निरौलाले जानकारी दिए । यसअघि धनुषामा कोरोना संक्रमणको बिरामी फेला परेको थिएन् । जनकपुरधामस्थित प्रादेशिक अस्पतालको आइसोलेसनमा ५ जना संक्रमितलाई राखिएको छ । धनुषा र महोतरीमा संक्रमित देखिएका ४ जना र सर्लाहीका एक जना मानसिक सन्तुलन गुमाएका संक्रमित व्यक्तिलाई राखिएको प्रमुख जिल्ला अधिकारी निरौलाले बताए । मानसिक सन्तुलन गुमाएका व्यक्तिको स्वाब संकलन गरे लगत्तै उनी भागेको बताउँदै निरौलाले रिेपोर्ट पोजेटिभ आएपछि बिहानै उनलाई घरबाट ल्याएर आइसोलेसनमा राखिएको बताए ।
बिरगंजका सवै पत्रकारको परिक्षण धमाधम
वीरगन्जका दुई पत्रकारमा कोरोना संक्रमण पुष्टि भएपछि यहाँ कार्यरत सबै पत्रकारको कोरोना परीक्षण थालिएको छ । बुधबार बिहान १० बजेदेखि १ बजेसम्म पत्रकारमा कोरोना भए नभएको परीक्षणका लागि स्वाब संकलन गरिएको छ । त्यसका लागि पत्रकारहरु नारायणी अस्पतालमा पुगेका छन् भने हालसम्म ७० जना पत्रकारको नमुना संकलन भएको अस्पतालले जनाएको छ । अस्पतालका अनुसार दिउँसो १ बजेसम्म ७० पत्रकारको कोरोना परीक्षणका लागि स्वाब संकलन गरिएको हो । सो अवधिमा नभ्याइएका बाँकी पत्रकारको साँझ ५ देखि ६ बजेसम्म स्वाब संकलन हुने बताइएको छ । कोरोना परीक्षणका लागि १२० पत्रकारले नाम लेखाएको अस्पतालले जनाएको छ । हालसम्म पर्सा्जिल्लामा दुई पत्रकारसहित ८२ जनामा कोरोना पुष्टि भएको छ । पर्सा कोरोना संक्रमितको ‘हटस्पोट’ बनेपछि स्थानीय प्रशासनले निषेधाज्ञा समेत जारी गरेको छ ।
पत्रकारको कोरोना परीक्षणको रिपोर्ट शुक्रबारसम्म आइपुग्ने बताइएको छ ।
