एसपि रिपोर्टर
काठमाणडौं , असार ७ : नेकपा (एकीकृत समाजवादी) का सांसद कृष्णकुमार श्रेष्ठले जनतालाई सार्वजनिक ऋणको भारी बोकाएर बजेटमा आफ्नो राजनीतिक स्वार्थ पूरा गर्ने दिवा सपना नदेख्न चेतावनी दिएका छन् ।
शनिवार प्रतिनिधि सभा बैठकमा विनियोजन शीर्षकहरूमाथिको छलफलमा भाग लिँदै सांसद श्रेष्ठले १६५ निर्वाचन क्षेत्रका जनताले आफ्नो गाँस काटेर तिरेको करको अवमूल्यन नगर्न आग्रह गर्दै राज्यको स्रोत साधनमा समानुपातिक अधिकार दिइनुपर्ने बताएका हुन् ।उनले राज्य स्रोतको दुरुपयोग गर्ने दुःसाहसलाई जनताले २०८४ मा जवाफ दिने बताउँदै बजेट विनियोजनमा गरिएको बेइमानी तत्काल सच्याउन माग गरे । सांसद श्रेष्ठले बजेटमाथि कब्जाको नीतिले आगामी चुनाव जित्छु भन्ने लागेको छ भने दिवा सपनाबाट बिउँझन आग्रह गरे । उनले भने, ‘अब यो बजेटको विषयमा छलफलमा भाग लिन सहभागी भइरहँदा सत्ता पक्ष र प्रतिपक्ष माननीयहरूको कुरा सुनियो । तर, विडम्बना किन हो थाहा भएन । मन्त्रीज्यूहरूको पनि मन्त्रालय मन्त्रालयकै प्रतिस्पर्धा । कसले आफ्नो क्षेत्रमा बजेट हाल्ने भन्ने प्रतिस्पर्धाले गर्दा यो बजेटमाथि जुन विश्वसनीयता हुनुपर्ने हो त्यो विश्वसनीयता भएको पाएको छैन । त्यसैले यो वर्ष त हामीले बोलेर मात्र हुनेवाला केही छैन, आगामी वर्षको बजेटमा यस्ता कुरा नदोहोर्याउनका लागि आग्रह गर्न चाहन्छु ।’उनले सरकारले ल्याएको बजेटले मधेस प्रदेशलाई उपेक्षा गरेको बताउँदै सिङ्गो बजेट आफू अनुकूलका क्षेत्रमा प्रयोग गर्ने ठुला नेताको प्रवृत्ति यो वर्ष पनि दोहोरिएको जिकिर गरे । उनले यो सरकारको ढुकुटी सत्तापक्ष, ठुला नेता र मन्त्रिमण्डलमा भएका नेताहरूका लागि मात्र हो ? मन्त्री, उपप्रधानमन्त्रीहरू, पूर्व प्रधानमन्त्री, प्रधानमन्त्री र ठुला नेताका क्षेत्रमा मात्र बजेट राख्नुको अर्थ के हो ? भन्दै प्रश्न गरे ।उनले भने, ‘के देशका १६५ निर्वाचन क्षेत्रका जनताले आफ्ना गाँस काटेर यो मुलुक बनाउन कर तिरेका छैनन् ? राज्यको स्रोत साधनमा उनीहरूको समानुपातिक अधिकार छ कि छैन ? जनतालाई सार्वजनिक ऋणको भारी बोकाएर आफ्नो राजनीतिक स्वार्थ पूरा गर्ने नेताले दिवा सपना नदेखे हुन्छ । बजेट बनाउँदा राज्य स्रोतको दुरुपयोग गर्ने दुःसाहसलाई जनताले २०८४ मा जवाफ दिनेछन् हेक्का राख्नुहोला । राज्य सञ्चालनको जिम्मा लिएकाहरूले बजेट विनियोजनमा कुन हदसम्मको बेइमानी गरेका छन् भन्ने जान्न यही संसद्मा सत्ता पक्षका सांसदहरूले राखेको कुराबाट थाहा हुन्छ । हामी प्रतिपक्ष दलका सांसदहरूको गुनासोको सुनुवाइ हुने वातावरण बनाउने दायित्व तपाईँको हो सभामुख महोदय । बजेट विनियोजनमा गरिएको बेइमानी तत्काल सच्याइयोस् । आफ्नो निर्वाचन क्षेत्रमा मात्रै बजेट हालेपछि तपाईँलाई लागेको होला २०८४ को चुनाव जित्न सजिलो हुन्छ । तर, याद राख्नुस् तपाईँको पैतृक सम्पत्ति जसरी गरि आफ्नो मनलाग्दी राज्य कोषको दुरुपयोग गर्नेलाई जनताले २०८४ मा जवाफ दिनेछन् । म तपाईँहरूलाई रोष्ट्रमबाट खुला चुनौती दिन चाहन्छु, अहिले आफ्नो निर्वाचन क्षेत्रमा मात्र बजेट केन्द्रित गर्ने कुन क्षेत्रमा चुनाव लडूँ भन्नुस्, म २०८४ मा तपाईँको क्षेत्रमा चुनाव लड्न आउँछु । तपाईँ बजेट हालेको कारणले मात्र म जित्छु भन्ने दिवा सपना नदेख्नुस् । बजेटमाथि कब्जाको नीतिले २०८४ मा चुनाव जित्छु भन्ने दिवा सपनाबाट बिउँझिन आग्रह गर्न चाहन्छु ।’उनले दैलेखमा रहेको पेट्रोलियम पदार्थ मिथेन ग्यासको अन्वेषणबाट आएको प्रारम्भिक प्रतिवेदनले सबैलाई उत्साहित बनाएको बताउँदै अब कनिका छरे जसरी बजेट छर्ने प्रवृत्ति बन्द गरी यस प्रकारका परिणाममुखी परियोजनामा लगानी वृद्धिका लागि आग्रह गरे । उनले भने, ‘भर्खरै दैलेखमा रहेको पेट्रोलियम पदार्थ मिथेन ग्यासको अन्वेषणबाट आएको प्रारम्भिक प्रतिवेदनले सबै नेपालीलाई उत्साहित बनाएको छ । यसका लागि सम्मानित सदनमार्फत यस कार्यमा प्रत्यक्ष र अप्रत्यक्ष रूपमा संलग्न सबैलाई धन्यवाद दिँदै निरन्तरता र नतिजाका लागि सरकारको ध्यानाकर्षण गराउन चाहन्छु । अब कनिका छरे जसरी बजेट छर्ने प्रवृत्ति बन्द गरी यस्ता परिणाममुखी परियोजनाहरूमा लगानी वृद्धिका लागि आग्रह गर्न चाहन्छु ।’उनले दैलेखमा रहेको पेट्रोलियम पदार्थ मिथेन ग्यासको अन्वेषणबाट आएको प्रारम्भिक प्रतिवेदनले सबैलाई उत्साहित बनाएको बताउँदै अब कनिका छरे जसरी बजेट छर्ने प्रवृत्ति बन्द गरी यस प्रकारका परिणाममुखी परियोजनामा लगानी वृद्धिका लागि आग्रह गरे । उनले भने, ‘भर्खरै दैलेखमा रहेको पेट्रोलियम पदार्थ मिथेन ग्यासको अन्वेषणबाट आएको प्रारम्भिक प्रतिवेदनले सबै नेपालीलाई उत्साहित बनाएको छ । यसका लागि सम्मानित सदनमार्फत यस कार्यमा प्रत्यक्ष र अप्रत्यक्ष रूपमा संलग्न सबैलाई धन्यवाद दिँदै निरन्तरता र नतिजाका लागि सरकारको ध्यानाकर्षण गराउन चाहन्छु । अब कनिका छरे जसरी बजेट छर्ने प्रवृत्ति बन्द गरी यस्ता परिणाममुखी परियोजनाहरूमा लगानी वृद्धिका लागि आग्रह गर्न चाहन्छु ।’
