एसपी रिपोर्टर
जनकपुरधाम, असोज १० : विश्व पर्यटन दिवस आज नेपालमा पनि विविध कार्यक्रम आयोजना गरी मनाइएको छ । ‘सबैका लागि पर्यटन : पहुँचयोग्य विश्वव्यापी पर्यटनको प्रवर्द्धन’ भन्ने नारासहित हरेक वर्ष २७ सेप्टेम्बरमा विश्व पर्यटन दिवस मनाउने गरिन्छ । नेपालमा भने ‘पर्यटन र हरित लगानी’ भन्ने नाराका साथ दिवस मनाइएको छ ।
दिवसको अवसरमा मधेश सरकारको उद्योग, बाणिज्य तथा पर्यटन मन्त्रालयले जनकपुरधाममा बृक्षारोपण गर्नुका साथै प्रभात फेरी कार्यक्रम गरेको छ । बुधवार विहान जनकपुरधामको रेल्वे स्टेशनमा वृक्षारोपण गरि स्टेशनबाट जानकी मन्दिर सम्म प्रभात फेरी गरिएर दिवस मनाइएको छ ।
प्रभातफेरीलाई सम्बोधन गर्दै मन्त्री सुनिता यादवले नेपालको विकास र उन्नतीको एक मुल आधार पर्यटननै रहेकाले यस्को सम्भाव्यता र विकास आवश्यक रहेको बताइन । मधेश प्रदेशमा रहेका पर्यटनका केन्द्रहरुको थप स्तरन्नोती गर्न सकिए मधेशलाई पर्यटनको हव बनाउन सकिने उनको भनाई थियो । मन्त्रालयका राज्य मन्त्री रहवर अन्सारीले मधेशका धार्मिक पर्यटनका केन्द्रहरुको उचित सौन्दर्यकरण र विकास भए मात्र पर्यटक मधेशमा टिक्न सक्ने बताए ।
कार्यक्रममा प्रदेश सांसद रामअशिष यादव, जनकपुरधाम उपमहानगरपालिकाका उपप्रमुख किशोरी साह सहित वातावरण अभियानी, वृक्षारोपण अभियानी, पर्यटन व्यवसायी, व्यापारी, विद्यार्थीहरुको उपस्थिती रहेको थियो । सोहि अवसरमा काठमाण्डौंमा त्रिभुवन विदेशबाट आएका पर्यटकहरुलाई विमानस्थलमा स्वागत, पर्यटन क्षेत्रमा योगदान गर्ने व्यक्ति एवं संस्थालाई सम्मान, प्रभातफेरी, रक्तदान लगायतका कार्यक्रम आयोजना गरिएको छ । दिवसका अवसरमा संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड र पर्यटन विभाग तथा पर्यटन क्षेत्रका अगुवा संघसंस्थाले विभिन्न कार्यक्रम गरी दिवस मनाएका छन् ।
कोरोना भाइरस संक्रमणको महामारीबाट करिब तीन वर्ष शिथिल बनेको मुलुकको पर्यटन क्षेत्र अहिले करिब पुरानै लयमा फर्किएको छ । नेपाल पर्यटन बोर्डका अनुसार सन् २०२३ भित्र नेपालको पर्यटन पुनरुत्थान हुने विश्वास छ । विश्व पर्यटन संगठनले पनि सन् २०२३ सम्म नेपालको पर्यटन पुनरुत्थान हुने प्रक्षेपण गरेको छ ।
पर्यटन बोर्डको तथ्यांकअनुसार सन् २०२३ को आठ महिनामा छ लाख एक हजार तीन सय ६० पर्यटक नेपाल आएका छन् । अघिल्लो वर्ष एक लाख ४० हजार ३०० पर्यटकले नेपाल भ्रमण गरेका थिए । सन् २०२१ मा ५५ हजार चार सय ४७ पर्यटक नेपाल आएका थिए । सन् २०२० मा पर्यटक आगमन संख्या दुई लाख २० हजार ८५ मात्र थियो । सन् २०१९ मा हालसम्मकै बढी ११ लाख ९७ हजार १९१ बाहृय पर्यटक नेपाल घुम्न आएका थिए । नेपालमा यतिखेर मुख्य पर्यटकीय सिजन सुरु भएको छ । विभिन्न मुलुकबाट पदयात्री पर्यटक उल्लेख्य संख्यामा नेपाल आउने क्रम जारी छ ।
