एसपी रिपोर्टर
जनकपुरधाम, फागुन २० : नेपाल सरकार र प्रतिबन्धित विप्लव समुह बिच तिन बुँदे सहमती भएसंगै नेकपा ओली समुह र विप्लव समुह बिच कार्यगत एकता हुने औपचारिक बाटो खुलेको छ । राजनितिक जानकारहरु त पार्टीगत एकता सम्मको आंकलन गरिरहेका छन् । सरकार र नेत्र विक्रम चन्द विप्लव नेतृत्वको प्रतिबन्धित नेपाल कम्युनिष्ट पार्टीबीच ३ बुँदे सहमति भएको छ । आज बिहान भएको दोस्रो चरणको वार्तामा सहमति जुटेको हो ।
सहमति अनुसार सरकारले विप्लवको पार्टीमाथि लगाएको प्रतिबन्ध हटाउने भएको छ । प्रतिबन्धित नेपाल कम्युनिष्ट पार्टीले शान्तिपूर्ण रुपमा राजनीतिक क्रियाकलाप गर्ने भएको छ । साथै नेपाल कम्युनिष्ट पार्टीले आफ्ना सम्पूर्ण राजनीतिक विषयहरूको समाधान संवादका माध्यमबाट गर्ने, आफ्ना सम्पूर्ण राजनीतिक क्रियाकलापहरू शान्तिपूर्ण रुपमा सञ्चालन गर्ने, नेपाल सरकारका तर्फबाट लगाइएको नेपाल कम्युनिष्ट पार्टी माथिको प्रतिबन्ध हटाउने, सम्पूर्ण बन्दीको रिहाइ र मुद्दा खारेजी गर्ने सहमति सरकार र विप्लव पक्षबीच भएको छ ।
बन्दी रिहाई संगै विभिन्न घटना र प्रकरणहरुमा कैदबन्दीको जिवन बिताइरहेका विप्लव समुहका नेता कार्यक्रताहरुको रिहाई हुने र उनीहरु पनि खुल्ला राजनितिमा आउने बाटो खुलेको हो ।
यस्तो छ कार्यगत एकता अघि बढाउने योजना
फागुन २१ गते दिनको २ बजे विशेष समारोहकाबीच सहमती सार्वजनिक गरिने सहमति पनि भएको छ । उक्त समारोहलाई सरकारका तर्फबाट प्रधानमन्त्री केपी शर्मा ओली र नेपाल कम्युनिष्ट पार्टीका तर्फबाट महासचिव विप्लवले सम्बोधन गर्ने कार्यक्रम राखिएको छ । सहमतिको हस्ताक्षरमा विप्लवका तर्फबाट दुवै पक्षका वार्ता टोलीका प्रमुख प्रकाण्ड र सरकारकातर्फबाट गृहमन्त्री रामबहादुर थापाले हस्ताक्षर गरेका छन् ।
यसै बिच सरकार र विप्लव नेतृत्वको नेकपाबीच भएको ३ बुँदे सहमतिको राजनीतिक दलका नेताहरुले स्वागत गरेका छन् । बिहीबार बिहान विप्लवका तर्फबाट खड्गबहादुर विश्वकर्मा, उदय चलाउने र सरकारका तर्फबाट गृहमन्त्री रामबहादुर थापा र राजन भट्टराईबीच ३ बुँदे सहमति भएपछि सरकार र विप्लव समूहबीच भएको सहमतिलाई विभिन्न दलका नेताहरुले स्वागत गरेका छन् ।
राप्रपाका अध्यक्ष कमल थापाले ट्वीट गर्दै सरकार र नेकपा विप्लव समूहका बीचमा भएको सहमति सकारात्मक रहेको बताएका छन् । उनले संवाद र शान्तिपूर्ण राजनीतिक माध्यमबाट समस्याको समाधान खोज्ने नेकपाको प्रतिबद्धता स्वागतयोग्य रहेको उल्लेख गरेका छन् । यस्तै जनता समाजवादीका नेता उपेन्द्र यादवले विप्लव नेतृत्वको दल शान्तिपूर्ण रुपमा राजनीतिका आउनु सकारात्मक रहेको प्रतिक्रिया दिए । यादवले अहिले शान्तिपूर्ण राजनीतिमा आएपनि आगामी दिनमा कसरी अगाडि बढ्छन् त्यो महत्वपूर्ण हुने उल्लेख गरे ।
नेकपा प्रचण्ड–नेपाल पक्ष नेता पम्फा भुसालले पार्टीमा सहमतिबिना विप्लवलाई प्रतिबन्ध लगाइएको उल्लेख गर्दै अहिले प्रतिबन्ध फुकुवा गर्नु सामान्य कुरा भएको उल्लेख गरिन् । उनले यसलाई सरकारको सफलतासँग जोड्न नहुने तर्क गरिन । नेपाली कांग्रेसका सह–महामन्त्री प्रकाशशरण महतले हिंसा छोडेर शान्तिपूर्ण राजनीतिमा आउनु सकारात्मक रहेको बताउँदै लोकतान्त्रिक मूल्य मान्यतामा रहेर राजनीति गर्नु, संविधानप्रति प्रति प्रतिबद्ध हुनु सकारात्मक विषय भएको प्रतिक्रिया दिए । यसैगरी सरकार र विप्लव नेतृत्वको नेकपाबीच भएको ३ बुँदे सहमतिको नेकपा मालेले पनि स्वागत गरेको छ ।
फेसबुकबाट तपाईको प्रतिक्रिया !