एसपी रिपोर्टर
जनकपुरधाम, माघ ३ : नेपाली काँग्रेसले शनिवार जनकपुरधाम उपमहानगरपालिकासहित देशभरका ७ सय ५३ वटै स्थानीय तहमा विरोध प्रदर्शन गरेको छ ।
प्रधानमन्त्री केपी शर्मा ओलीको सिफारिसमा राष्ट्रपति विद्यादवी भण्डारीले प्रतिनिधिसभा विघटन गरेको विरोधमा काँग्रेसले गरेको चरणवद्ध आन्दोलनको घोषणा अन्तर्गत शनिवार देश व्यापी कार्यक्रम अनुसार जनकपुरधाममा समेत विरोध प्रर्दशन गरिएको नेपाली कांग्रेस जनकपुरधाम उपमहानगरपालिका नगर समिति सभापति मनोज साहले बताएका छन ।

पूर्व घोषित कार्यक्रम अन्तर्गत आज देशभरका ७ सय ५३ वटै स्थानीय तहमा प्रतिनिधिसभा विघटन विरुद्ध प्रदर्शन गरिएको हो । नेपाली कांग्रेस जनकपुरधाम उपमहानगरपालिका नगर सभापति मनोज साहको नेतृत्वमा जनकपुरधाम गोपाल धर्मशालाबाट निस्केको मोटरसाइकल जुलुस नगरको रामचोक, जनकचोक, शिवचोक, भानुचोक सहित नगरको विभिन्न भागको परिक्रमा गर्दै जनकचोकमा पुगेर कोणसभा गरिएको थियो ।

कोणसभालाई नगर सभापति मनोज साह, नेपाली कांग्रेस धनुषा सभापति महेश शंकर गिरी, नगर सचिव रविन्द्र सिंह लगायतका नेताहरुले सम्बोधन गरेका थिए । संसद विघटनको कार्यलाई नेपाली काँग्रेसले असंवैधानिक र अलोकतान्त्रिक ठहर गरेको छ ।

यस अघि काँग्रेसले पुस १३ गते १ सय ६५ निर्वाचन क्षेत्रमा र पुस २५ गते ३ सय ३० प्रदेशसभा निर्वाचन क्षेत्रमा विरोध प्रदर्शन सहित विभिन्न विरोधका कार्यक्रमहरु गर्दै आएको छ ।
