प्रचण्ड भनेकै पदका लागि खेलिरहने खेलाडी : पोखरेल, सर्लाहीमा ओली समुह (तस्वीर)

एसपी रिपोर्टर
सर्लाही, पुष २८ : प्रचण्ड भनेकै पदको लागि भागिरहने नेता रहेको नेकपा ओली समुहका नेता इश्वर पोखरेलले बताएका छन् । ‘कांग्रेस र मधेसवादी दलसँग साठगाँठ गरेर प्रचण्ड प्रधानमन्त्री बन्ने दाउमा थियो’ सर्लाही सदरमुकाम मलंगवामा मंगलवार आयोजित कार्यकर्ता भेला कार्यक्रमलाई सम्बोधन गर्दै कामचलाउ सरकारका उप–प्रधानमन्त्री समेत रहेका पोखरेलले भने, ‘महाधिवेशनबाट जितेका अध्यक्षलाई हटाउने खेल पनि राजनिति हो ?’

पार्टी छोडेर गएकाहरुलाई फिर्ता हुन पनि उनले आग्रह गरेका छन् । पोखरेलले पार्टी एकताका बेला देखिनै पार्टी भित्र अन्तिरिक समस्या रहेको बताए । दुई पार्टी बीच एकता हुने बेलामा पार्टी भित्र राम्रोसँग अभ्यास हुन नसकेकै कारण अहिले पार्टीमा फुटको अवस्था आएको उनको तर्क छ । आउँदो बैशाख १७ र २७ गते दुई चरणमा चुनाव हुने बताउँदै कार्यकर्तालाई चुनावको तयारीमा लाग्न उनको सुझाव छ ।

कार्यक्रममा पुर्व भौतीक पुर्वाधार तथा विकास मन्त्री तथा स्थाई कमिटि सदस्य रघुविर महासेठ, शहरी विकास मन्त्री प्रभु साह सहितकाले सम्बोधन गर्दै पार्टी भित्रको अराजकता एवं अन्तरघात, मुलुकमा विद्यमान अस्थिरता र भ्रष्टाचारको विरुद्ध संघर्ष गर्दै पार्टीभित्र सुदृढ़ीकरण सहितको एकता, मुलुकमा स्थायित्व, अग्रगमन एवं सुशासन सहित प्राप्त उपलब्धिहरुको रक्षा एवं विकास गर्नका लागी ताजा जनादेश मार्फत मुलुकलाई अग्रगमनको दिशामा अगाडि बढाउनुपर्ने बताए । कार्यक्रममा कानुन मन्त्री लिलानाथ श्रेष्ठ, नेता सत्यनारायण मण्डल र सुमन प्याकुरेल सहितको उपस्थिती थियो ।