शहिद पत्रकार उमा सिंहको १२ औं स्मृती दिवसमा विभिन्न कार्यक्रम

एसपी रिपोर्टर
जनकपुरधाम, पुष २७ : शहिद पत्रकार उमा सिंहको १२ औं स्मृती दिवस मनाइएको छ । एक साहासिक र निडर पत्रकार उमा सिंहको विभत्स हत्या भएको १२ वर्ष पुरा भएको छ । दिवसको अवसरमा पत्रकार तथा सम्बन्धित विभिन्न संस्थाहरुले विभिन्न कार्यक्रम गरि उमाको साहस र निर्भिकताको चर्चा र स्मरण गरेका छन् ।

नेपाल पत्रकार महासंघ धनुषा शाखा आफनै भवनमा श्रद्धाञ्जली कार्यक्रम गरि उमाको स्मरण गर्नुका साथै श्रद्धाञ्जली अपर्ण गरेका छन् । अध्यक्ष अनिल कुमार मिश्रको अध्यक्षता तथा वरिष्ठ पत्रकार तथा प्रेस स्वतन्त्रता सेनानी राजेश्वर नेपाली, विएम खनाल, रामभरत साह, प्रदेश २ का महासचिव किरण कर्ण सहितको उपस्थितीमा गरिएको दिपप्रज्वलन तथा श्रद्धाञ्जली कार्यक्रममा वक्ताहरुले उमालाई स्मरण गर्दै श्रद्धाञ्जली अर्पण गरेका छन् ।

कार्यक्रममा वरिष्ठ पत्रकार नेपालीले उमाको स्मरण गर्दै अहिले सिडिओ एसपीको लागि पत्रकारिता भइरहेको भन्दै पत्रकारले हाकिमको नभई पिउनको पुजा गर्नु पर्ने अनि मात्र प्रखर पत्रकारिता हुने बताए । कार्यक्रममा प्रदेश २ का कोषाध्यक्ष प्रविण साह, पुर्व केन्द्रिय सदस्य अजय अनुरागी सहितको उपस्थिती रहेको थियो ।

उपमहानगरपालिकाले पनि मनाए स्मृती दिवस

सो अवसरमा जनकपुरधाम उपमहानगरपालिकाले समेत एक कार्यक्रम गरि शहिद पत्रकार सिंह प्रति श्रद्धाञ्जली अपर्ण गरेको छ । सो अवसरमा उपमहानगरपालिका प्रमुख लालकिशोर साहले स्व. पत्रकार उमा सिंहको स्मृतिमा जनकपुरधाम उपमहानगरपालिकाले रु ५ लाखको अक्षय कोष स्थापना गरेको बताउदै सिंहको १२ औं स्मृति दिवसको अवसरमा कोष सञ्चालनका लागि बैंकमा रकम जम्मा गर्नका लागि चेक हस्तान्तरण समेत गरेका छन् । उनले यो अक्षय कोषबाट उमा सिंहको नाममा उत्कृष्ट काम गर्ने पत्रकारलाई पत्रकारिता पुरस्कार प्रदान गर्ने बताए । साथै सहभागिहरुले शहिद उमा सिंह प्रति श्रद्धाञ्जली समेत अर्पण गरेका छन् ।

क्रियाशिल महिला पत्रकारको पनि कार्यक्रम

सोहि अवसरमा क्रियाशिल महिला पत्रकार धनुषाले समेत शहिद पत्रकार उमा सिंह प्रति श्रद्धाञ्जली अर्पण गर्न जानकी मन्दिर प्राङ्गणमा दिप प्रज्वलनको कार्यक्रम गरेको छ । धनुषा अध्यक्ष तथा नेपाल पत्रकार महासंघ प्रदेश २ की उपाध्यक्ष रिंकु कुमारी मिश्रको अगुवाईमा जनकपुरधामका पत्रकार, महिला पत्रकार, युवा अभियन्ता सहितको उपस्थितीमा दिप प्रज्वलन गरि शहिद सिंह प्रति श्रद्धाञ्जली अर्पण गरिएको छ ।

महोतरीको बर्दिबासमा समेत कार्यक्रम

उता महातरीको बर्दिबासमा समेत स्थानिय पत्रकारहरुले शहिद उमा सिंह प्रति श्रद्धाञ्जली अर्पण गर्दै सिंहको योगदान, निर्भिकता र साहसको चर्चा परिचर्चा गरेका छन् । उनको हत्याले महिला पत्रकार डराएको तर उनको प्रेरणाले झन मजबुतीका साथ अगाडि बढन मद्दत पुगेको उनीहरुको भनाई थियो ।