एसपी रिपोर्टर
जनकपुरधाम, असोज १९ : देशभर बलात्कारका घटना बढ्दै गइरहेको भन्दै दोषीलाई कारबाहीको माग गर्दै युवाहरूले प्रदर्शन गरेका छन् । बलात्कारका घटना रोक्न र दोषीलाई कारबाहीको दायरामा ल्याउन सरकार असफल भइरहेको भन्दै ‘युथ एलायन्स अगेन्स्ट रेप’ ले जनकपुरधाममा प्रदर्शन गरेको हो ।
एलायन्स आवद्ध युवाहरू जनकपुरको जनक चोकमा जम्मा भएर नारा जुलुस प्रदर्शन गर्दै जिल्ला प्रहरी कार्यालय पुगेका थिए । जिल्ला प्रहरी कार्यालय गेटमा नारा जुलुस गर्दै उनीहरूले धनुषाको धनुषाधाम–४ की बलात्कृत किशोरीका लागि न्याय र बलत्कारीलाई सजाय दिन माग गरेका छन् । केही दिनअघि धनुषाधाममै एक किशोरीसँग ७÷८ जनाले सामूहिक बलात्कार गरेका थिए । बलात्कारमा संलग्न दुईजना पक्राउ परेपनि अन्य फरार छन् । युवाहरूले फरार अभियुक्तलाई पक्राउ गरी कारबाहीको दायरामा ल्याउन माग गरेका छन् ।
पीडित किशोरीको परिवारलाई पैसाको प्रलोभन दिइ घटना मिलाउन खोज्ने एकजना अभियुक्तका बाबुलाई प्रहरीले केही दिनअघि पक्राउ गरेको थियो । पोल पोलमा सरकारले आफ्नो प्रशंसाको पोस्टर झन्ड्याइरहेपनि बलात्कारका घटना रोक्न असफल भएको एलायन्सका गुञ्जा रायले बताईन । बलात्कार लगायतका घटना रोक्न र दोषीलाई कारबाहीको दायरामा ल्याउन युवाहरूले प्रदर्शन गरेको उनले बताए ।
जनकपुरधामको जनकचौकवाट सुरु भएको रयाली जनकपुरधामको विभिन्न चौकहरुमा प्रदर्शन गर्दै जिल्ला प्रहरी कार्यालय अगाडि विरोध प्रदर्शन समेत गरेका थिए ।
