एसपी रिपोर्टर
जनकपुरधाम, साउन १३ : धनुषाको सबैला नगरपालिकाका शम्भु सदाको हिरासतमा मृत्यु भएको घटनाको अध्ययन गर्न संघीय सांसदको टोली जनकपुर आइपुगेको छ । प्रतिनिधिसभाको कानुन, न्याय तथा मानवअधिकार समितिको टोली मंगलबार जनकपुर आई सरोकारवालासँग छलफल सुरु गरेको छ । देशका विभिन्न हिरासतमा मृत्यु भएको घटनाका स्थलगत अध्ययनका लागि केही दिनअघि उक्त समितिले ६ सदस्यीय अध्ययन समिति गठन गरेको थियो ।
उक्त समितिका पदाधिकारीले सबैलास्थित इलाका प्रहरी कार्यालयको हिरासतभित्रै मृत्यु भएका शम्भु सदाका परिवारसँग छलफल गरेका छन् । मृतक सदाको घर पुगेर आफूहरुले उनकी आमा, श्रीमतिसहित छिमेकीसँग घटनाबारे जानकारी लिएको समितिका सदस्य एवं धनुषाकै सांसद उमाशंकर अरगरियाले जानकारी दिए । उनका अनुसार नागरिक आन्दोलनका अभियन्ता, प्रमुख जिल्ला अधिकारी, जिल्ला न्यायाधिवक्तासँग पनि शम्भु सदाको मृत्युबारे जानकारी लिइएको छ ।
सवारी ज्यान मुद्दामा पक्राउ परी इलाका प्रहरी कार्यालय सबैलाको हिरासतमा राखिएका सबैला १२ निवासी २३ बर्षीय शम्भु २७ जेठमा प्रहरी कार्यालयकै शौचालयभित्र झुण्डिएको अवस्थामा मृत फेला परेका थिए । शम्भुको हत्या भएको उनको परिवारले बताउँदै आएको छ । त्यसैगरि टोली उपचारको अभावमा मृत्यु भएका हँसपुर नगरपालिकाका राजु सदाको घरमा समेत पुगेर परिवारजन तथा छिमेकीहरु संग छलफल गरेका छन् ।
संसदीय अध्ययन समितिमा नेपाल कम्युनिष्ट पार्टी (नेकपा) का सांसद शेरबहादुर तामाङको संयोजकत्वमा जनता समाजवादी पार्टीका सांसद उमाशंकर अरगरिया, नेपाली कांग्रेसका पदमनारायण चौधरी र मीनबहादुर विश्वकर्मा, नेकपाका लालबहादुर थापा र समीमा हुसैन सदस्य छन् ।
समितिका पदाधिकारी मंगलबार धनुषाबाट टोली रौतहटतर्फ जाने सदस्य अरगरियाले बताए । बुधबार इलाका प्रहरी कार्यालय गरुडाको हिरासतमा प्रहरीको यातनाबाट मृत्यु भएका विजय राम र रौतहटमै हत्या भएका निरञ्जन रामको परिवार तथा सरोकारवालालाई भेटेर घटनाको अध्ययन गरिने उनले बताए ।
सम्बन्धीत एक प्रतिवेदन हस्तान्तरण गरियो
प्रदेश २ मा दलितहरुको हत्याका विषयमा गठित अध्ययन समितिलाई शम्भू सदाको हत्या सम्बन्धी प्रतिवेदन हस्तान्तरण गरिएको छ । संघीय संसदको कानून, न्याय तथा मानव अधिकार समितिद्धारा गठित अध्ययन भ्रमण समितिका संयोजक शेरबहादुर तामाङ्गलाई शम्भू सदाको हत्या सम्बन्धी प्रतिवेदन बुझाइएको हो ।
धनुषा जिल्लाको सबैला नगरपालिका १२ रघुनाथपुरका शम्भू सदाको सबैलास्थित इलाका प्रहरी कार्यालयमा शंकास्पद रुपमा लाश भेटिएको थियो । उक्त विषयमा सञ्चारकर्मी बीपी साहको संयोजकत्वमा ५ सदस्यीय अध्ययन समिति गठन गरी प्रारम्भिक अध्ययन गरिएको थियो । उक्त समितिले तयार पारेको १९ पृष्ठको प्रतिवेदन संघीय संसदीय समितिलाई मंगलबार हस्तान्तरण गरिएको हो ।
संसदीय समितिले मंगलबार शम्भू सदाको परिवार, इलाका प्रहरी कार्यालय सबैला र जिल्ला प्रशासन कार्यालय धनुषामा भ्रमण गरेको थियो । संसदीय समितिमा धनुषा २ बाट निर्वाचित सांसद तथा जनता समाजवादी पार्टीका नेता उमाशंकर अरगरिया, काँग्रेसका साँसद पद्मनारायण चौधरी, भीम प्रधानलगायतका छन् ।
