पुरन रौनियार
जनकपुरधाम, असोज २ : अन्तत नेपाल रेल्वेको नयाँ रेल जनकपुरधाम आइपुगेको छ । करिव एक दशक देखि बन्द रहेको नेपालको एकमात्र जनकपुरधाम–जयनगर रेल सेवा पुनः सञ्चालनका लागि नेपाल सरकारले आफै किनेको नयाँ रेल जनकपुरधाम आइपुगेपछि हेर्नेहरुको भिडभाड लागेको छ यद्यपि रेल चल्न अझै दुई महिना जती लाग्ने भनाई सरकारी पक्षको छ ।
आइतवार विहानै ११ बजे जनकपुरधाम आउने हल्ला चलेको रेल दिउँसो करिव डेढ बजे जनकपुरधाम आइपुगेको हो । तिन घण्टा सम्म प्रतिक्षारत सर्वसधारणको भिड रेलको हर्न सुन्ने वितिकै हौसिए । रेल हेर्न जनकपुरधाम स्टेशनमा जम्मा भएको भिडले तालीको गडगडाहटले रेलको स्वागत गरे ।
हेर्नोस भिडियो
नेपाल सरकारलाई रेल हस्तान्तरण गर्न आएका अधिकारीहरुलाई नेपाल सरकारको तर्फवाट नेपाल रेल्वेका महानिर्देशक गुरु भट्टराईसहितकाले फुलको गुच्छा दिएर स्वागत गरे । त्यसपछि भारत सरकारका प्रतिनिधी मुख्य यान्त्रिक अभियन्ता दिपक त्रिपाठी सहितका टोलीले रेल नेपाल सरकारका प्रतिनिधी भट्टराईलाई हस्तान्तरण गरे । करिव एक दशक देखि बन्द रहेको रेल जनकपुरधाममा आधुनिक तरिकाले सञ्चालन हुने भएपछि स्थानिय मात्र नभई व्यापारी समेत उतिकै उत्साहित छन् । भारतवाट समान ल्याउदाँ सुरक्षाकर्मीले दुःख दिने गरेको बताउदै उनीहरु अव सजिलै सरसमान आयात हुने भएपछि खुसी व्यक्त गर्छन ।
यद्यपि रेल तत्कालै सञ्चालन हुने सम्भावना भने देखिदैन । नेपाल रेल्वे कम्पनीका महानिर्देशक भट्टराईले रेल विधिवत सञ्चालन हुन अझै डेढ दुई महिना लाग्ने बताउछन् । कर्मचारी भर्ना, कानुन र कार्यविधी तथा भारत सरकारसंगको सम्झौतामा केहि प्राविधिक काम गर्न वाँकी रहेको र कोरोनाले समेत साथ नदिरहेकाले समय लाग्ने उनको भनाई छ ।
नेपाल पत्रकार महासंघ धनुषाका अध्यक्ष अनिल कुमार मिश्रले पनि रामजानकी विवाह पञ्चमी महोत्सवलाई लक्षित गरेर रेल सञ्चालन गर्न दुवै सरकार तयारी गरिरहेको बताउछन् । प्राविधीक काम, कर्मचारी भर्ना र यस बिचमा चोरी भएका र मर्मत गर्न वाँकी रहेका संरचनाको काम गर्न समेत समय लाग्ने भएकाले विवाह पञ्चमीमा मात्र रेल चल्न सक्ने बताए ।
भारत सरकारको प्रतिनिधीका रुपमा त्रिपाठी संगै परियोजनाका महाप्रबन्धक जिवी नागिन्दर र उप मुख्य नागरिक अभियन्ता विकी रागन्ना समेत आएका छन । नेपालका तर्फवाट भट्टराईका आलावा रेल्वे विभागका कर्मचारीहरु, धनुषा र महोतरीका प्रमुख जिल्ला अधिकराीहरु सहितको उपस्थिती थियो । जनकपुरधाम आएको रेल आज जनकपुरधाममै राखिने र भोली देखि सञ्चालन नहोउन्जेल सम्म भारतको जयनगर स्थित नेपाली स्टेशनमा राखिने बताइएको छ ।
तस्वीर/भिडियो : संजय साह
