एसपी रिपोर्टर
जनकपुरधाम, भदौ २५ : तेस्रो मधेस आन्दोलनको क्रममा जनकपुरधाममा सहादत प्राप्त गरेका शहिदहरुको स्मरण गरिएको छ । आजैका दिन जनकपुरधाममा तीन जनाले सहादत दिएको आज ५ वर्ष पुरा भएको छ । वि.सं. २०७२ साल भदौ २५ गतेका दिन तेस्रो मधेस आन्दोलनको क्रममा जनकपुरधाम उपहानगरपालिका वडा नं. १ मिल्स एरियाबाट दिलीप यादव, निकु यादव र सँजय चौधरीलाई शसस्त्र प्रहरीले टाउकोमै गोली हानी हत्या गरेको थियो ।
त्यै आन्दोलनको अर्का सहयात्रीहरु अहिले प्रदेश सरकारमा मन्त्री मात्र छैनन वडा अध्यक्ष देखि मेयर उपमेयर खाइरहेका छन् । यद्यपि कतिपयले आज ति विर शहिदहरुलाई स्मरण गर्दै श्रद्धाञ्जली अर्पण गरेका छन् । जनकपुरधामको जनकचौक स्थित श्री जनक मन्दिरको प्राङ्गणमा मधेशी दलवाट प्रदेश सांसद देखि मेयर उपमेयर सहितका नेता कार्यक्रताहरुले शहिदहरुको तस्वीरमा फुल र अविर अर्पण तथा दिप प्रज्वलन गरि श्रद्धाञ्जली अर्पण गरे ।
साथै जनकपुरधामकै तपसीचौकमा समेत शहिदहरुको तस्वीर राखि दिप प्रज्वलनका साथै फुल र अविर अर्पण गरि श्रद्धाञ्जली अपर्ण गरिएको छ । तर तिनै पहुँचमा रहेका नेताहरु शहिद परिवारलाई खुसी पार्ने गरि कुनै पनि महत्वकांक्षी कार्यक्रमहरु ल्याउन नसकेको गुनासो सर्वत्र छ ।
स्थानीय प्रशासनले लगाएको कर्फयू आदेशलाई पनि अवज्ञा गर्दै ‘चलु जनकपुर भरु जनकपुर’ कार्यक्रमको दौरान पाँच वर्ष पहिले आजैका दिन गाउँ गाउँबाट आएका आन्दोलनकारीको भिडले सुरक्षा घेरा तोडन खाजेपछि प्रहरीले अन्धाधुन्ध गोली फायर गर्न थालेपछि तिनैजनाको ज्यान गएको थियो ।
आन्दोलन र प्रदर्शनको क्रममा धनुषा जमुनियाका १३ वर्षिय निकु यादव, सिनुरजोडाका १७ वर्षिय दिलीप यादव र महेन्द्रनगरका सदभावना पार्टीका जिल्ला सदस्य २८ वर्षिय सँजय चौधरीलाई प्रहरीले नियन्त्रणमा लिएर टाउकोमा गोली हानेका थिए । तत्कालिन सँयुक्त लोकतान्त्रिक मधेसी मोर्चाले आव्हान गरेको “चलु जनकपुर भरु जनकपुर” कार्यक्रममा सहभागी हुन जनकपुर आईपुगेका तीनै जनाले मधेस आन्दोलनको नाममा ज्यानको आहुति दिएका थिए ।
