एसपी रिपोर्टर
जनकपुरधाम, भदौ ११ : गए राति जनकपुरधामस्थित रसिक विहारी भगवान तेली कुटीको पर्खाल भत्काइएपछि सो जातीका अगुवाहरु आक्रोसित भएका छन् । उनीहरु जनकपुर टुडेका सञ्चालक तथा सम्पादक बृजकुमार यादवले नै रातारात पर्खाल भत्काउन लगाएको आरोप लगाउदै पत्रकार यादवको घरमा पत्थराव समेत गरेका छन् । जातिका अगुवाहरु घर घेराउ गर्दै पत्थरवाजी र नारावाजी गरेका छन् । मिडियाको आडमा आफुहरुको एतिहाँसिक जातिय कुट्टिको जमिन कब्जा गर्न लागेको आरोप उनीहरुको छ ।
एता सम्पादक यादवले घरमा आएर हुलहुज्जत र पत्थरवाजी गरेको प्रति दुःख व्यक्त गर्दै आफुले कुनै डोजर नचलाएको र पर्खाल नभत्काएको बताए । उनले नक्सा अनुसार कुट्टिको देखिएको २ कठ्ठा ११ धुर जमिन यदि अपुग रहेको खण्डमा स्वयम आफनो जमिनवाट दिन तयार रहेको भन्दै भने, ‘यदि मेरो जमिन कम भइरहेको छ र कुट्टीको जमिनभन्दा बढि अतिरिक्त जमिन त्यहाँ छ भने त्यो मेरो हुन्छ नी ?।’ उनले आफुसंग एक कठ्ठा जमिनको लालपुर्जा, भवनको नक्सा र नापीमा कित्ताकाट सहितका सवै प्रमाणहरु रहेको बताए । तर आफुले रातारात पर्खाल भत्काएको आरोप भने उनले अस्वीकार गरेका छन् ।
यस विषयमा बुझन खेज्दा कुट्टी तर्फको समुहको अगुवाई गरिरहेका नेपाल उद्योग बाणिज्य संघ प्रदेश २ का अध्यक्ष समेत रहेका शिवशंकर साह हिराले तर्क जे भएपनि वार्ता र छलफलमा बस्नुको सट्टा रातारात डोजर चलाएर पर्खाल भत्काउनु गलत रहेको आरोप लगाए । उनले दुवै पक्षले आफनो तर्क राख्न छलफल र सम्वाद गर्नुपर्नेमा राती भएको घटनाले जबरजस्तीको संकेत गरेको बताए । उनले कानुनी उपचारमा जाने र संर्घष गर्ने बताए ।
बाह्र विगहा नजिक तथा जानकी हेल्थ केयरको छेउमा रहेको तेली कुटीमाथि राति करिब ११ बजेतिर डोजर चलाएर कुटीको पर्खाल भत्काएको समाजका सत्यनारायण साहले जानकारी दिएका छन् । लकडाउन मै गुठीको जग्गामा बाटो पनि काटिएको र राती पर्खाल भत्काइएको आरोप तेली युवा समाजका अध्यक्ष राजु साहको छ ।
यादवको घरमा पत्थराव गर्ने ९ जनालाई प्रहरीले नियन्त्रणमा लिएको छ भने यादव प्रहरीमा उजुरी दिने तयारी थालेका छन् ।
