एसपी रिपोर्टर
जनकपुरधाम, भदौ ७ : गत भदौ ३ गते रौतहटमा हनुमान मन्दिरका पुजारीको गोली हानी हत्या गरिएको विषयमा विभिन्न हिन्दुवादी संघसंस्थाहरुले प्रधानमन्त्रीलाई ज्ञापन पत्र पठाएको छ । रौतहटको प्रमुख जिल्ला अधिकारी मार्फत उनीहरुले प्रधानमन्त्रीलाई ज्ञापन पत्र बुझाएका हुन । ज्ञापन पत्र बुझाउनेहरुमा नेपाल बिश्व हिन्दु महासंघ रौतहट र हिन्दू परिषद नेपाल रौतहट रहेको छ ।
ज्ञापन पत्रमा हत्या गरिएका महन्थ पुजारीलाई शहिद घोषणा देखि शान्ति सुरक्षाको व्यवस्था र शुक्षम अनुसन्धान गरि हत्यारालाई कडा कारवाहीको मांग गरिएको छ । महासंघले एक विज्ञप्ती जारी गर्दै माधवनारायण नगरपालिका २ खेसर्हिया स्थित हनुमान मन्दिरका सन्त श्रीराम साहलाई खाना खाने वेलामा हत्या गरिएको घटनाको सत्य तथ्य छानबिन गरि दोषी उपर कडा कार्यवाही गर्नुका साथै स्वर्गीय सन्त लाई शहिद घोषणा गर्नुपर्ने मांग राखेको छ ।
नेपाल विश्व हिन्दु महासंघ जिल्ला कार्यसमिति रौतहटका अध्यक्ष त्रिभुवन ओझा एवं सचिव राधेश्याम सहनीद्वारा प्रमुख जिल्ला अधिकारीलाई बुझाइएको ज्ञापन पत्रमा भनिएको छ, ‘आफनो भौतीक स्वार्थ त्याग गरि अध्यात्मिक मार्गबाट विश्वमा मानवता, सदभाव र सनातन ज्ञानको ज्योतीवाट वशुधैब कुटुम्बकमको संस्कार विकासमा तल्लीन यस्ता महामानव साधुसन्तहरु प्रतिको अमानविय व्यवहार गर्ने तत्वहरु कदापि माफी लायक हुनै सकदैन ।’ सनातन धर्मावलम्वीहरुको धार्मिक स्थल धर्मको पथ प्रदर्शक मात्र नभई धार्मिक शैन्य शक्ति पनि हो भन्दै सनातन हिन्दु धर्मावलम्वीहरुको धैर्यताको परिक्षा लिने काम नगर्न समेत सचेत गराइएको छ ।
एता परिषद रौतहटले घटना भएको आज ४ दिन वितिसक्दा पनि हाल सम्म हत्यामा संलग्न हत्याराको पक्राउ वा जिल्ला प्रहरी कार्यालय र जिल्ला प्रशासन कार्यालय रौतहटद्वारा कुनै जानकारी सार्वजनिक नभएको हुनाले यथा शिघ्र हत्याराको पहिचान गरि कानुनको दायरामा ल्याएर साधुधर्मात्मा जस्तो व्यक्तिको हत्यामा चासो लिन प्रशासन संग मांग गरिएको छ । उनीहरुले पनि पुज्य स्व. साधुलाई शहिद घोषणा र हत्यारालाई फाँसीको सजाय मांग गर्दै प्रमुख जिल्ला अधिकारी इन्द्रदेव यादवलाई ज्ञापन पत्र बुझाए ।
सो अवसरमा हिन्दू परिषद नेपाल रौतहटका संयोजक ओमप्रकाश साह, प्रवक्ता अभिमनु कुमार पटेल, गौर नगरपालिकाका नगर अध्यक्ष बिनोद उपाध्याय, देवाही गोनाही नगरपालिकाका नगर अध्यक्ष मनोज साह, यमुनामाई गाउँपालिकाका अध्यक्ष निरज साह, ईशनाथ नगरपालिकाका अध्यक्ष बिनोद यादव लगायतको सहभागिता थियो ।
कांग्रेस उपसभापति निधीद्वारा सरकारको आलोचना
एता घटना सम्बन्धमा नेपाली कांग्रेसका केन्द्रिय उप–सभापति विमलेन्द्र निधीले केहि गर्न नसकेको भन्दै सरकारको आलोचना गरेका छन् । पुजारीका हत्याको अनुसन्धान गरी दोषि उपर उनले कारवाहीको मांग गरेका छन् । सामाजिक सञ्जाल ट्विटरमार्फत उनले घटना प्रति आफनो बिचार राखेका हुन ।
ट्विटरमा उनले लेखेका छन् :
रौतहट जिल्लाको माधवनारायण नगरपालिकामा हनुमान मन्दिरका पुजारी श्रीराम साहलाई राती खाना खाने बेलामा गोली हानी हत्या गरेको चार दिन भए पनि सरकारले अहिले सम्म केही गरेको छैन । शिघ्र हत्याराको खोजी गरि कडा सजाय दिन सरकारसंग माग गर्दछु । मृतकको आत्माको चीर शान्तिका लागि प्रार्थना गर्दछु ।
