एसपी रिपोर्टर
काठमाण्डौं, भदौ ६ : सत्तारुढ नेपाल कम्युनिष्ट पार्टी (नेकपा) को विवाद समाधानका लागि गठित ६ सदस्यीय कार्यदलले अध्यक्षद्वय केपी शर्मा ओली र पुष्पकमल दाहाल ‘प्रचण्ड’लाई आफ्नो प्रतिवेदन बुझाएको छ । महासचिव विष्णुप्रसाद पौडेल नेतृत्वको सो कार्यदलले सर्वसम्मतिले तयार पारेको प्रतिवेदन आज प्रधानमन्त्री निवास बालुवाटारमा अध्यक्षद्वयलाई बुझाएको नेकपाका प्रचार विभाग उपप्रमुख सूर्य थापाले जानकारी दिए ।
प्रतिवेदनमा समहतीका मुख्य बुँदाहरु यस्ता छन्
१. कार्यकारी अध्यक्षलाई प्रधानमन्त्रीले हस्तक्षेप नगर्ने तर दुवै जनाको सहमतीमा कुनै निर्णय लिने
२. महाधिवेशन तोकिएको समयमै
३. महाविधेशनवाट सक्दो सहमतीमा नेतृत्व चयन बहुमतीयमा जान परे ओलीले प्रचण्डलाई समथर्न गर्ने
४. सरकार पुरै ओलीले चलाउने यद्यपि मन्त्रीमण्डल पुर्नगठन हुने
५. सरकारको काममा पार्टी नपर्ने तर राजनितिक नियुक्ती पार्टीको निर्णयमा हुने
६. प्रदेश सरकारहरु पनि आवयश्कता अनुसार फेर बदल हुने
७. स्थाई कमिटिका अलपत्र एजेन्डामा छलफल चलाउने र केन्द्रिय सदस्यहरुको मांग सम्बोधन गर्ने
कार्यदलमा शंकर पोखरेल, सुरेन्द्र पाण्डे, भीम रावल, जनार्दन शर्मा र पम्फा भुसाल सदस्य थिए । सो प्रतिवेदन अध्यक्षद्वय ओली र प्रचण्डले छलफल गरी आगामी सचिवालय बैठकमा पेश गर्ने बताइएको छ । यही भदौ १ गतेको नेकपा सचिवालय बैठकले सो कार्यदल गठनलाई अनुमोदन गरी कार्यादेश स्पष्ट गरेको थियो । नेकपामा गत असार १० गते शुरु भएको स्थायी कमिटीमा नियमित कार्यसूचीका अतिरिक्त शक्ति बाँडफाँट र सरकार–पार्टीबीचको समन्वयबारे विवाद उत्पन्न भएकामा अब सहमतितिर ठोस पहल अघि बढेको नेताहरुले बताएका छन् ।
