एसपी रिपोर्टर
जनकपुरधाम, साउन ३२ : अध्यक्षद्वयको भित्री सहमती अनुसार मन्त्री मण्डल पुर्नगठनका लागि नेकपामा गृहकार्य सुरु भएको छ । मन्त्री मण्डल पुर्नगठनको तयारीसंगै धनुषावाट सांसद जुली महतोको नाम पनि प्राथमिकतामा रहेको छ । उनलाई शहरी विकास नभए खानेपानी मन्त्रीको जिम्मेवारी दिइने सम्भावना छ । महतोको नाम ओली र प्रचण्ड दुवै तर्फवाट आइरहेको नेकपा स्रोतको दावी छ ।
महिला नेतृमा धनुषामा राम्रो छवि बनाएकी महतो क्षेत्रमा पनि नेता कार्यक्रतासंग एकदमै घुलमिलमा रहने नेतृका रुपमा परिचित छन् । पुर्नगठन हुने मन्त्री मण्डलमा धनुषावाट पुुरुष सांसदको सम्भावना कम देखिएको र मधेशी मुलको महिला मन्त्री मण्डलमा समावेश गरिए सकारात्मक सन्देश जाने भएकाले महतोको नाम प्राथमिकतामा रहेको बताइन्छ । यस अघिको मन्त्री मण्डलमा धनुषावाट रघुविर महासेठ र मात्रिका प्रसाद यादव मन्त्री थिए भने अहिलेको मन्त्री मण्डलमा धनुषा निल छ ।
यस्तो छ नेकपा केन्द्रको गृहकार्य
नेपाल कम्युनिस्ट पार्टीभित्र सहमतिको खाका बन्दै गर्दा पार्टी कमिटी र मन्त्रिमण्डलमा पुर्नगठन हुने भएको छ । अध्यक्षद्वय केपी शर्मा ओली र पुष्पकमल दाहाल प्रचण्डबीच पुर्नगठन गर्ने लगभग सहमति बनेपछि नयाँ सम्भावना देखिएको छ ।
प्रधानमन्त्री केपी शर्मा ओलीले अध्यक्ष र प्रधामन्त्री दुवै पदबाट राजीनामा दिनुनपर्ने र अध्यक्ष प्रचण्ड, वरिष्ठ नेता माधवकुमार नेपाल र झलनाथ खनाललाई पनि मान्य हुने गरी सहमतिको खाका बनाइन लागिएको छ । दुई अध्यक्षबीच सहमतिको खाकाबारे लगभग सहमति भएको बुझिएको छ । यद्यपि नेपाल र खनाल भने शसंकित रहेको बुझिएको छ ।
विश्वस्त स्रोतका अनुसार दुई अध्यक्षबीच शक्तिको बाँडफाँड गरिने भएको छ । सरकार ओलीले र पार्टी प्रचण्डले चलाउने गरी खका बनाइने सहमति भएको छ । मन्त्रीमण्डल पुर्नगठन र केही मुख्यमन्त्रीमा समेत हेरफेर हुने भएको छ ।
सहमतिको खाका तयार गर्न महासचिव विष्णु पौडेलको संयोजकत्वमा बनाइएको छ सदस्यीय कमिटी आफैमा अर्थपूर्ण छ । कमिटीले दुई अध्यक्षबीच भएको सहमति अनुसार खाका कोर्ने तयारी गरेको छ । सहमति निर्माणमा सक्रिय भुमिका खेलेका महासचिव विष्णु पौडेल र स्थायी कमिटी सदस्य जर्नादन शर्मा पनि रहेका छन् ।
यसैगरी पौडेलको संयोजकत्वमा गठित कार्यदलमा रहेका स्थायी कमिटी सदस्यहरु भीम रावल, जर्नादन शर्मा, सुरेन्द्र पाण्डे र पम्फा भुषाल पनि पुर्नगठित मन्त्रीमण्डलमा आफै पनि रहने सम्भावना रहेको बुझिएको छ । पौडेल पार्टीकै जिम्मेवारीमा रहने र शंकर पोखरेलले मुख्यमन्त्री छाडेर मन्त्री बन्ने सम्भावना पनि रहेको बुझिएको छ । जर्नादन शर्मा गृह मन्त्री, भीम रावल परराष्ट्र वा सञ्चार र सुरेन्द्र पाण्डे अर्थमन्त्री बन्ने सम्भावना रहेको विश्वस्त स्रोतले जानकारी दिएको छ । पम्फा भुषाल पनि मन्त्री बन्ने निश्चितप्रायः छ ।
अहिले भएकामध्ये प्रदीप ज्ञवाली, योगेश भट्टराई, घनश्याम भुषाल मन्त्री कायमै रहने सम्भावना रहेपनि अन्य मन्त्रीहरुमा फेरबदल हुने सम्भावना रहेको विश्वस्त स्रोतले जानकारी दिएको छ । सम्भवतः आउँदो हप्ता मन्त्रीमण्डल पुर्नगठन हुनेछ । पुर्नगठित मन्त्रीमण्डलमा ओली, प्रचण्ड, नेपाल, खनाल र गौतम पक्षका नेताहरुको समान सहभागिता हुने गरी तयारी भएको छ ।
सहमतिको खाका तयार गरेपछि भोलि नै सचिवालय बैठक बसी यसबारे छलफल हुने भएको छ । सोमबार बैठक बसी निष्कर्षमा पुगी कार्यान्वयनमा लगिने बुझिएको छ ।
