एसपी रिपोर्टर
जनकपुरधाम, साउन १६ : अगामि साउन २१ गते भारत उतर प्रदेशको अयोध्यामा भगवान श्री रामको मन्दिर शिल्यानास कार्यक्रमको अवसरमा जनकपुरधाममा रामधुनी सिताराम किर्तन र दिपोत्सव हुने भएको छ । जानकी मन्दिरका महन्थ रामतपेश्वर दास र उनका शिष्य रामरोशन दास दुवैजनाले पत्रकार सम्मेलनको आयोजना गरि अयोध्यामा एतिहाँसिक रुपमा हुन लागेको भब्य मन्दिर शिल्यानासमा श्री रामको ससुराली मिथिला (जनकपुरधाम)मा पनि भब्यता हुने बताएका छन् ।
अगामि साउन २१ गते बुधवार अयोध्यामा शिल्यानासका लागि तोकिएको शुभ साइत विहान ११ बजे देखि १ बजे सम्म जानकी मन्दिरमा रामधुनी सिताराम नाम किर्तनको आयोजना हुनुका साथै सोहि दिन वेलुकी जानकी मन्दिर सहित जनकपुरधामको राम मन्दिर, शिवमन्दिर लगायत जानकी चौक, जनकचौक शिवचौक र रामचौक सहितको मन्दिरहरुमा समेत दिपोत्सव हुने बताएको छ । साथै उनले जनकपुरधाम सहित मिथिलावासीलाई समेत सो दिन दिप वालेर उत्सव मनाउन आग्रह गरेका छन् ।
‘यस्तो शुभ र अपार हर्षको घरीमा जनकपुरधामवाट करिव १० हजारको संख्यामा अयोध्या जाने योजना थियो तर महामारीको अवस्था र लकडाउनका कारण सम्भव छैन’ महन्थ दासले भने, ‘समय अनुकुल भएपछि मिथिलावासीको तर्फवाट जनकपुरधामवाट भब्य तरिकाले अयोध्या गई कोशेली र इच्छा अनुसारको सहयोग गर्ने छौं ।’ धेरैले जाने इच्छा व्यक्त गरेको उनले बताए । जस्मा कांग्रेस उपसभापति विमलेन्द्र निधीको समेत उनले नाम लिएका छन् । निधिले समेत आफु औपचारिक रुपमै कुनै अवसरमा मिथिलाको तर्फवाट अयोध्या जाने इच्छा व्यक्त गरेको उनको भनाई थियो ।
