एसपी रिपोर्टर
जनकपुरधाम, साउन ११ : मुख्यमन्त्री लालबाबु राउतले कोरोना महामारी नियन्त्रणका लागि सीमानाकामा थप कडाई गर्न सुरक्षा निकायलाई निर्देशन दिनु भएको छ । आज सम्पन्न पिसिएमसीको बैठकमा मुख्यमन्त्री राउतले पछिल्लो समयमा प्रदेशमा कडा लक्षण सहितको कोरोना संक्रमित फेला पर्नुको मुख्यकारण सीमानाका बाट लुकीछुपी आउने हरुको रहेको उल्लेख गर्नु हुँदै तीन वटै सुरक्षा निकायलाई सीमा नाकामा थप कडाई गर्न निर्देशन दिनु भएको हो ।
बैठकमा मुख्यमन्त्री राउतले लक्षण सहितको कोरोना संक्रमितहरु देखिन थाले पनि यस बाट जोगिन अपनाउनु पर्ने उपायहरु बारे विज्ञहरु संग सुझाव समेत लिनु भएको छ । कोरोना नियन्त्रणको लागि प्रदेश सरकार बाट भए गरेको कामकाजको प्रगति बारे जानकारी लिनु हुँदै मुख्यमन्त्री राउतले रोकथाम , नियन्त्रण र उपचारलाई थप प्रभावकारी बनाउन निर्देशन समेत दिनु भएको छ ।
बैठकमा समाजिक विकास मन्त्री नवल किशोर साह, प्रमुख सचिव अर्जुन प्रसाद पोखरेल सहित विभिन्न मन्त्रालयका सचिवहरु, विज्ञ समूहका सदस्यहरु, सुरक्षा निकायका प्रमुखहरु सहितको उपस्थिति रहेको थियो ।
प्रादेशिक अस्पताल तथा आइशोलेसनको अवलोकन
यसैविच मुख्यमन्त्री राउत र समाजिक विकास मन्त्री साहले आजै जनकपुरधामको प्रादेशिक अस्पताल र यहाँ स्थित आइशोलेसनको स्थलगत अवलोकन गर्दै जानकारी लिएका छन् । प्रदेश २ मा कोरोनाको खतरा बढन थालेको र दिनानुदिन मृत्यु हुन थालेपछि प्रदेश सरकार सक्रियता देखाएको हो । स्वास्थ्य कार्यदल तथा सल्लाहकार सहित पुगेको टोली चिकित्सक, अस्पताल प्रमुखहरुसंग छलफल गरेका छन् ।
टोलीले भोली आइपर्ने समस्या र समाधान तथा व्यवस्थापनका लागि कसरी अगाडि बढने विषयमा छलफल गरेको हो । टोलीमा पुर्व स्वास्थय राज्यमन्त्री डा. सुरेन्द्र यादव, सल्लाहकार समितिका सदस्य डा. रामकेवल साह सहितको सहभागिता थियो ।
