एसपी रिपोर्टर
जनकपुरधाम, साउन १० : श्रावण शुक्ल पञ्चमीका दिन प्रत्येक वर्ष मनाइने नाग पञ्चमी आज परम्पराअनुसार नागको पूजा गरी मनाइँदै छ । नागका बाह्र नाम भए पनि आठ कूलका आठ वटा नागको पूजा गर्ने वैदिक सनातनकालदेखिको परम्परा छ । यस अवसरमा जनकपुरधाममा सुरक्षा सर्तकता अपनाउदै नागपञ्चमी मनाइदै छ । जनकपुरधाम वडा नं. ४ स्थित विषहरा मन्दिरमा श्रद्धालुहरु सुरक्षा सर्तकता अपनाउदै पुजापाठ गरिरहेका छन् ।
साथै जानकी मन्दिरको फुलवारीमा समेत नाग देवताको प्रतिमा बनाएर तथा नागवंशी समाजले पनि तपसी चौकमा नागदेवताको प्रतिमा बनाई नागपञ्चमी मनाइरहेका छन् । अनन्त, वासुकी, पद्म, महापद्म, तक्षक, कुलीर, कर्कट र शंख गरी आठ नागलाई आजको दिन ब्राह्मण पुरोहितबाट पूजाआजा गरी घरको ढोकामाथि टाँसिन्छ ।
आजको दिन घरमा नाग टाँसेपछि खेतबारीमा खनजोत नगर्ने र नाग, सर्प लगायतका घिस्रने जनावरलाई मार्नु हुँदैन भन्ने मान्यता छ । घरका मूलढोकामा नागको तस्वीर टाँसेर पूजा गर्दा वर्षभर घरमा नाग, सर्प र बिच्छीलगायतका जीवले दुःख नदिनुका साथै अग्नि, मेघ र चट्याङको भयबाट पनि बच्न सकिन्छ भन्ने धार्मिक विश्वास छ ।
वैदिक मान्यताअनुसार नागलाई सर्पको राजा मानिन्छ । नाग रिसाए भने अनिष्ट हुने भएकाले नागलाई खुसी पार्न पूजा गर्ने परम्परा बसेको धर्मशास्त्रका जानकारहरु बताउँछन् । आज बिहानैदेखि काठमाडौंको नागपोखरी र टौदह, भक्तपुरको सिद्धपोखरी लगायत देशभरका नागदह, कुण्ड, र नाग स्थानमा विशेषरुपमा पूजा गरी नागको सम्मानका साथ गाईको दूध, अक्षता, दुबो, खीर र रोटी लगायतका परिकार चढाउने गरिन्छ ।
तराई मधेशमा विधि अनुसार राती नाग देवताको आगमन हुने भन्दै धानको लावा र दुध नागदेवतालाई चढाइन्छ ।
वैज्ञानिक रुपमा प्रकृतिमा भएका विषालु पदार्थलाई नाग, सर्पलगायतका जीवले शोषण गरी मानवलगायत अन्य जातिलाई विषालु पदार्थको प्रभाव पर्न नदिने अनुसन्धानबाट पुष्टि गरेपछि ऋषिमुनिले नागजातिको पूजाआजा गर्ने रीत बसालेको विश्वास छ । श्रद्धालुहरुलाई अनिवार्य मास्क लगाउन श्री विषहरा मन्दिर पुजा समितिले आग्रह गरेको र सेनिटाइजरको व्यवस्था समेत गरेको छ ।
शनिवार परेकाले जनकपुरधाम स्थित श्री शनिदेव माँ भद्रकाली मन्दिर सहित श्री शनिदेव र श्री हनुमान जीको मन्दिरहरुमा समेत समेत पुजापाठ गर्न श्रद्धालुहरु पुग्ने गरेका छन् । जनकपुरधामका मेयर लालकिशोर साहले समेत आज श्री शनिदेव माँ भद्रकाली मन्दिरमा पुजापाठ गर्नुका साथै मन्दिरको विषयमा जानकारी लिएका छन् ।
