एसपी रिपोर्टर
जनकपुरधाम, साउन ७ : धरानस्थित बीपी कोइराला स्वास्थ्य विज्ञान प्रतिष्ठानमा उपचारार्थ थप एक जना कोरोना संक्रमित बिरामीको मृत्यु भएको छ । चार दिन अघि उच्च ज्वरो र खोकी लागेर बीपी कोइराला स्वास्थ्य विज्ञान प्रतिष्ठानको इमरजेन्सीमा उपचारका लागि गएका महोत्तरीका ६० वर्षीय पुरुषको मृत्यु भएको बीपी कोइराला स्वास्थ्य विज्ञान प्रतिष्ठान धरानका प्रवक्ता डा. निदेश सापकोटाले जानकारी दिएका छन् ।
उनी उपचारमा आउदा गम्भीर बिरामी भएकोले आइसियुमा राखेर उपचार गरिँदै आएकोमा उनको पिसिआर परीक्षण गर्दा कोरोना पोजेटिभ रिपोर्ट आएको थियो । उनमा कोरोना पोजेटिभ रिपोर्ट आएपछि प्रतिष्ठानको कोरोना आइसोलेसन कक्षको आइसियुमा भर्ना गरिएको थियो । आइसोलेसनको आइसियु कक्षमा उपचार गर्दा गर्दै गएराती उनको मृत्यु भएको प्रवक्ता सापकोटाले बताएका छन् ।
प्रवक्ता सापकोटाका अनुसार पछिल्लो समय उनको स्वास्थ्यमा प्रतिकुल समस्या देखिएसँगै मिर्गौलाले काम नगरेकोले डाईलेसिस पनि गर्नुपरेको थियो र निमोनिया पनि गम्भिर देखिएको थियो । मृतक प्रदेश २ को रहेकोले उनलाई प्रदेश २ मै पठाउनका लागि प्रदेश २ सरकारसँग समन्वय भइरहेको बताइएको छ । यो सँगै प्रतिष्ठानमा उपचारका लागि आएका कोरोना संक्रमित मध्ये मृत्यु हुनेको सङ्ख्या २ पुगेको छ । यस अघि सप्तरीको राजविराजका एक जनाको मृत्यु भएको थियो ।
