एसपी रिपोर्टर
जनकपुरधाम, साउन ४ : मेलम्ची खानेपानीको मुहान निरीक्षणका क्रममा पानीले बगाएर धनुषाका होनहार युवा ई. सतिश गोइतको मृत्युपछि मधेशका युवाहरु तातिएका छन् । उनीहरु विभागीय मन्त्री बिना मगरको राजिनामा र स्व.गोइतलाई शहिद घोषणाको मांग गर्दै दैनिक प्रदर्शनमा छन् ।
आइतवार जसपाका युवाहरु जिल्ला प्रशासन कार्यालय धनुषा मार्फत प्रधानमन्त्री केपि शर्मा ओलीलाई ज्ञापन पत्र बुझाउदै राज्यको लापरवाहीले मारिएका गोइतलाई न्याय दिन मांग गरेका छन् । जसपाका युवा नेता प्रशान्त झा अगुवाईको समुह प्रमुख जिल्ला अधिकारीलाई ज्ञापन पत्र बुझाउदै बिदामा रहेको गोइतलाई पानीको सतह बढदै गएकावेला सिनियर हुदाहुदै किन पठाइयो सहिता शंकाहरु उल्लेख गर्दै घटनाको छानविन समेत शहिद घोषणाको मांग गरेका हुन ।
धनुषा वाहेकका जिल्लामा समेत स्व. गोइत प्रति श्रद्धाञ्जलीका कार्यक्रम हुनुका साथै राज्यको लापरवाहीले मधेशका एक होनहार युवा गुमाउनु परेको भन्दै न्यायका लागि दैनिक प्रदर्शन भइरहेको छ । सिरहाको सुखी पुरमा समेत युवाहरुको समुह स्व.गोइत प्रति श्रद्धाञ्जली अर्पण गर्दै न्यायको लागि अपिल गरेका छन् ।
सुखिपुर युवा बिद्यार्थी र जनमत बिद्यार्थी संघ सुखिपुरको आयोजनामा ज्यान गुमाएका ई. सतिश गोईतको न्यायका लागि सिरहा सुखिपुरमा शान्तिपुर्ण श्रद्धाञ्जली कार्यक्रम सहित पिडित परिवारको न्यायका लागि घटनाको सत्य तथ्य छनबिन गरि छतिपुर्ती माङ्ग गर्दै बिरोध प्रदर्शन भएको हो ।
ई. गोइत निरिक्षणको क्रममा गुणस्तरहीन काम भएकाले सुरुङको १७ नम्बर ढोका फुट्दा पानीको बेगले गाडी नै बगाएपछि उनको निधन भएको हो । एकाएक ड्याममा पानीको सतह बढ्न थालेपछि निरीक्षणका लागि सतीशकै नेतृत्वमा टोली पठाइएको थियो ।
