एसपी रिपोर्टर
जनकपुरधाम, साउन ४ : धनुषा बटेश्वर गाँउपालिकाका किसानहरुले आफनो आवयश्कता अनुसारको कृषि औजार र उपकरणहरु पाएपछि खुसी भएका छन् । बटेश्वरका खास गरि तरकारी खेती गर्ने किसाहरुले स्थानिय बटेश्वर तरकारी पकेट कार्यक्रम अन्तर्गत आफुलाई आवयश्क पर्ने औजार र उपकरणमा सहुलियतका लागि र्फम भरेका किसानहरुलाई आइतवार प्रदेश २ ले सो औजार र उपकरणहरु उपलब्ध गराएको हो ।
प्रदेश २ का भुमि व्यवस्था कृषि तथा सहकारी मन्त्री शैलेन्द्र प्रसाद साहले बटेश्वरमा आयोजित एक समारोहका बिच किसानहरुलाई सो कृषि उपकरण र औजारहरु प्रदान गरेका छन् । पकेट कार्यक्रम मार्फत आफुलाई आवयश्क रहेको औजार र उपकरण उपलब्ध गराउन किसानहरुले दिएको आवेदनको आधारमा ५० प्रतिशत किसानको लगानीमा प्रदेश सरकारले ५० सहुलियत रकममा ति सरसमानहरु किसानलाई उपलब्ध गराएका हुन ।
१५ लाख किसानको लगानी र १५ लाख प्रदेश २ सरकारको सहयोग गरि कुल ३० लाख बराबरको सरसमानहरु हस्तान्तरण गरिएको कृषि ज्ञान केन्द्र धनुषाका प्रमुख शंकर प्रसाद साहले बताए । उपकरण तथा औजारहरु पाएपछि बटेश्वर तरकारी प्याकेट कार्यक्रमका अध्यक्ष राजदेव महतो सहित सरसमान पाउने किसानहरु खुसी भएका छन् । उनीहरुलाई मोटर ६० थान, स्प्रे चार्जर ५० र सादा ५० थान, डिलेभरी पाइप ३ सय केजी, क्रेक ३०० थान, ग्होल २ थान, ओल धुने मेशिन १०, पकेट पम्प १, पम्पसेट २, इनार १ र स्यालो टयुवेल ५ थान हस्तान्तरण गरिएको छ ।
साथै २० किसानहरुलाई हसिया, कोदालो र खुर्पी सहितका औजारहरु समेत निशुल्क प्रदेश सरकारले उपलब्ध गराएको छ । सो कार्यक्रममा मन्त्री साहले प्रदेश २ सरकार किसानहरुको सहयोगका लागि तत्पर रहको बताउदै आफुहरुले पाएको अधिकारीको सक्दो सदुपयोग गरि सरकारलाई किसान मैत्री बनाउन लागि परेको बताए ।
उनले भने, ‘धेरै अधिकार अझै पनि संघिय सरकारकै कब्जामा छ तर हामी जति सक्छौं किसानहरुको मन जित्ने कार्यक्रमहरु हर सम्भव ल्याउने प्रयास हुन्छ ।’ कार्यक्रममा सहकारी संघका ध्रुव नारायण यादव गाँउपालिकाका प्रमुख सहितको सहभागिता थयो ।
