एसपी रिपोर्टर
जनकपुरधाम, जेठ ३२ : प्रदेश २ सरकारको आगामि आर्थिक वर्षको वार्षिक निति तथा कार्यक्रम बहुमतले पारित भएको छ । आइतबार बसेको चौथो अधिवेशनको १० औं बैठकमा निति तथा कार्यक्रम निर्णायार्थ पेश हुदा बहुमतले पारित भएको हो ।
प्रदेश सरकारको आगामी आर्थिक वर्ष २०७७÷०७८ को वार्षिक नीति तथा कार्यक्रम बहुमतले पारित गरिएको छ । प्रदेश प्रमुख तिलक परियारले प्रदेशसभामा प्रस्तुत गरेको नीति तथा कार्यक्रमलाई पारित गरियोस् भन्ने मुख्यमन्त्री लालबाबु राउतले गरेको प्रस्ताव बहुमतले पारित भएको हो ।
प्रमुख प्रतिपक्षी नेपाली काँग्रेस लगायत प्रतिपक्षी दलले नीति तथा कार्यक्रमको विरोध गर्दै प्रदेशसभा सदस्यहरु बाबुलाल साह, दिलिप कुमार साह, शिवचन्द्र चौधरी, गोविन्द बहादुर न्यौपाने, रुबी कुमारी कर्ण, नरेश कुमार यादव, सुन्दर बहादुर विश्वकर्मा र सिता गुरुङ्ग लगायतकाले दर्ता गराएको संशोधन प्रस्ताव बहुमतले अस्विकृत भएपछि सभामुख सरोज कुमार यादवले निति तथा कार्यक्रम निर्णार्यथ प्रस्तुत गरेका थिए ।
दफावार छलफलका क्रममा उठेका प्रश्नहरुको विषयमा मुख्यमन्त्री राउतले जवाफ दिदै प्रदेश सरकारको भूमिकालाई प्रभावकारी बनाउँदै स्थानीय साधन स्रोतको अधिकतम उपयोग गर्दै समृद्धि र विकासमा अघि बढने धारणा राखे । छलफलमा उठेका छुटेका विषय वस्तुलाई आगामी दिनमा समेटेर लैजाने मुख्यमन्त्री राउतले प्रतिबद्धता व्यक्त गरे । यस प्रदेशलाई नमूना प्रदेश बनाउने बताउँदै उनले यसका लागि सबैसँग सहकार्य गर्दै अघि बढ्ने उल्लेख गरे ।
गत बुधवार नै पारित हुने कार्यसुची रहेपनि नीति तथा कार्यक्रम पारित हुन नदिन सत्तारुढ दलका सांसदहरु अनुपस्थित रहँदै आएका थिए । प्रदेशसभाको अर्को बैठक अषाढ १ गते साँझ ५ बजे बोलाइएको छ ।
