एसपी रिपोर्टर
महोत्तरी, जेठ २९ गते : लकडाउनको पूर्ण रुपमा पालना गर्दै नेपाली काँग्रेसका कार्यकर्ताहरु महोत्तरीको जलेश्वरमा आधा घण्टा सरकार विरुद्व मौन धर्नामा बसेका छन । देशमा रहेका तीनै तहका सरकारले कोरोनाबाट नागरिकलाई जोगाउनका लागि ठोस निती अवलम्वन नगरेको भन्दै विहीबार विहान उनीहरु जलेश्वरमा धर्ना दिएका हुन ।
भिटठामोड जनकपुर सडकखण्ड अन्र्तगत पर्ने जलेश्वरको शंकर चौकमा स्थानिय वजरंग नेपालीको नेतृत्वमा धर्नामा बसेकाहरु हात हातमा प्ले कार्ड लिएका थिए । कोरोना महामारीको समयमा सरकारले व्यवस्थापनमा चुकेको भन्दै सरकारको विरोधमा मौन धर्ना दिएको वजरंग नेपालीले बताए । समाजिक दुरी कायम राखि उनीहरु चर्को घाममा विहान ११ बजेदेखि विहान साढे ११ बजेसम्म धर्नामा बसेका थिए ।
बारामा समेत बिरोध
उता एक घर, कम्तिमा एक व्यक्ति, एक पिसिआर टेस्ट स्थानिय तहवाटै पहल होस भन्ने माग गर्दै बाराको फेटागाँउपालिका–१ का युवाहरुले आज भलुही चौकमा विभिन्न नारा सहितको प्लेकार्ड बोकी मास्क प्रयोग गरी समाजिक दुरीमा उभेर प्रदर्शन गरेका छन् ।
हाम्रो सबभन्दा नजिकको सरकार, हाम्रै स्थानिय निकाय भएकोले त्यसैको पहलमा एक घर, कम्तिमा एक व्यक्तिको पिसिआर टेस्ट गरि कारोनाको संक्रमण रोक्न सकिने भनेर अभियान संचालन गरेका विक्की महतोले जानकारी गराए । ‘हाम्रो सबभन्दा नजिकको सरकार हाम्रै स्थानिय निकाय हो, हामी प्रदेश र संघ चिन्दैनौ’ भन्दै सहभागि युवा राजेश प्रसाद कुशवाहाले भने ‘मात्र लकडाउन थपेर संक्रमण रोकिदैन, टेस्ट हुन जरुरी छ, र टेस्ट गर्नका लागि स्थानिय सरकारले पहल गरोस्, कम्तिमा एक परिवारबाट एक जनाको टेस्ट भयो भने संक्रमितलाई उपचार र निरोगीलाई काममा जान सजिलो हुन्छ ।’
