एसपी रिपोर्टर
जनकपुरधाम, जेठ २० : कोरोना भाइरस कोभिड १९ नियन्त्रणका लागि सरकारले लकडाउन जारी गरेपछि गरिव विपन्न र दैनिक मजदुरी गर्नेहरुलाई पिडा भएको छ । यस अवस्थालाई मध्येनजर गर्दै जनकपुरधाम स्थित श्री राम जानकी ज्यू भगवान तेली कुट्टी जानकीनगरले निःशुल्क खाना बितरण गरिरहेको छ । जनकपुरधाम उपमहानगरपालिका वडा नम्बर ७ स्थित जानकी नगर स्थित तेली कुट्टीले जेष्ठ १५ गते देखि दैनिक २ सय ५० घर परिवार लाई निःशुल्क खाना बितरण गर्दै आइरहेको छ ।
जनहितको काममा समाजलाई उत्साहित बनाउनका लागी मंगलबार प्रदेश २ का भूमि व्यवस्था कृषि तथा सहकारी मन्त्री शैलेन्द्र प्रसाद साह तेली कुट्टी पुगेर भोजन वितरण गर्दै समाजको कार्यलाई सराहना गरेका छन् । मन्त्री साहले यस्तो बेला भोकाहरुलाई खाना खुवाएर समाजले उतम परोपकारको काम गरेको भन्दै निःशुल्क खाना बितरणले समाजमा आपसी सदभाव समेत बढने बताए । साथै मन्त्री साहले भोजन वितरणमा लाग्ने एक दिनको सम्पुर्ण खर्च समेत आफनो निजि तर्फवाट प्रदान गरेका छन् ।
तेली कुट्टीका अध्यक्ष जिवछ साहका अनुसार लकडाउनमा समाजिक दुरी सहितका सवै नियम पालना गरि निःशुल्क खाना बितरण भइरहेको छ । आफुहरु सके सम्म लकडाउन अवधी सम्म यसलाई निरन्तरता दिने समेत उनले बताए । उनले गरिब तथा बिपन्नका साथै दैनिक ज्यालादारी गर्ने मजदुर र श्रमिकहरुलाई हातमुख जोर्न समेत समस्या रहेकाले श्री रामजानकी भगवान ज्यू तेली कुट्टी जानकीनगरको आयोजनामा निःशुल्क खाना बितरण समस्या रहुन्जेल बन्द नहुने बताए ।
प्रत्येक दिन करिव दुई सय देखि २सय ५० परिवार सम्मलाई खाना खुवाइरहेको कुट्टीले बतायो । निःशुल्क भोजन वितरणमा काली साह २१ हजार, सहदेव साह २१ हजार, मनमोहन राम साह २१ हजार, निरज साह २१ हजार, कारी साह ११ हजार, ललित साह एक सय किलो फौजी चामल, सिया किशोर एक सय केजी चामल, सोनफी साह ५ हजार, डाक्टर विनोद साह लगायत करिव ३० जनाले सहयोग गरेको भन्दै सवै सहयोगी र दाताहरुलाई अध्यक्ष साहले धन्यवाद तथा अभार ब्यक्त गरेका छन् ।
