एसपी रिपोर्टर
जनकपुरधाम, जेठ २० : प्रदेश २ का साँसदद्वय परमेश्वर साह र रामअशिष यादवले रुकुम पश्चिममा दलित युवकको हत्या प्रकरणलाई जातिय विभेद होइन भन्दा पनि सामाजिक नरसंंहार रहेको बताएका छन् । सांसदद्वयले घटनालाई गम्भीरता पूर्वक लिनु पर्ने र न्यायका लागि सबैले मिलेर लड्नु पर्ने बताएका छन् ।
राष्ट्रिय दलित पत्रकार संघ धनुषाको आयोजनामा मृतकहरु प्रति श्रद्धाञ्जली अर्पण र न्यायका लागि भन्दै मंगलवार जनकपुरधाममा आयोजना गरेको ‘दीप प्रज्वलन’ कार्यक्रममा साँसदद्वयले सो कुरा बताएका हुन । घटनाको यर्थात कुरा राज्यलाई थाहा हुँदाहुँदै पनि सरकारले गम्भीरता नदेखाउनु सबैका लागि दुर्भाग्यपुर्ण रहेको भन्दै साँसदद्वयले भने ‘अपराधको विरुद्धमा दलित, मधेशी, अल्पसंख्यक मात्र होइन, सबै मिलेर लड्नु पर्छ, दोषीमाथि कारवाही हुनुपर्छ ।’ अहिलेसम्म दोषीलाई समात्न नसक्नु दुःखद रहेको भन्दै साँसद साहले यो घटनाले अपराधलाई बढावा दिएको बताए ।
संघका अध्यक्ष कुलदीप दास प्रेमको नेतृत्वमा भएको दीप प्रज्वलन कार्यक्रममा अर्का साँसद राम अशिष यादवले जबसम्म अपराधलाई राज्यले बढावा दिन्छ तब सम्म देश सम्पन्न राष्ट्र बन्न नसक्ने बताए । ‘यो जातिय छुवाछुत होइन, छुवाछुत माथिको अपराध हो’ यादवले भने, ‘दोषीलाई कानूनी कारवाहीमा नल्याएमा जनता चुप लागेर बस्दैन, घटनामा न्याय नमिले गणतन्त्रको अनुभुति हुनै सक्दैन ।’
त्यस्तै वरिष्ठ पत्रकार श्याम सुन्दर शशिले घटनाप्रति आक्रोस व्यक्त गर्दै दलितले प्रेम गर्न पाउँछ कि पाउँदैन ? भन्ने प्रश्न गरेका छन् । दलितका बच्चाले निश्पक्ष र बिना दोष प्रेम गरेकै निहुँमा हत्या गरिदिनु संविधानको कहाँको संविधानमा लेखेको हो ।’ उनले यो ठूलो अपराध हो । अपराधी जुनसुकैलाई पनि कारवाही हुनैपर्छ तब मात्र कानूनी राज्यको परिकल्पना गर्न सकिने बताएका छन् ।
कार्यक्रममा नेपाल पत्रकार महासंघका केन्द्रिय सदस्य शैलेन्द्र झा, नेपाली काँग्रेसका जनकपुरधाम उपमहानगरपालिकाका नगरसभापति मनोज कुमार साह, महिला अधिकारकर्मी मुन्नी देवी दास, राष्ट्रिय दलित पत्रकार संघका प्रदेश अध्यक्ष कैलास दास सहितका व्यक्तिहरुले मृतकप्रति श्रद्धाञ्जली अर्पण गर्दै दोषीमाथि कारवाहीको माँग गरेका छन् । दीप प्रज्वलन कार्यक्रममा सैयौंको संख्यामा अधिकारकर्मीहरुको उपस्थिति रहेको थियो ।
