एसपी रिपोर्टर
महोत्तरी ,फागुन २१ :
नेपाल सरकारले श्रम, रोजगार तथा सामाजिक सुरक्षा मन्त्री शरत सिंह भण्डारीको नेतृत्वमा मधेश प्रदेशको महोत्तरी जिल्लाको बलवा नगरपालिका–६ मा नयाँ व्यवसायिक प्रशिक्षण केन्द्र स्थापना गर्ने निर्णय गरेको छ। यस केन्द्रले स्थानीय युवा तथा श्रमिकलाई रोजगारीका अवसर प्रदान गरी उनीहरूको जीवनस्तर उकास्ने लक्ष्य राखेको छ।
मन्त्री भण्डारीको पहलमा व्यवसायिक तालिमको पहुँच विस्तार गर्दै देशभर सीपमूलक तालिमलाई प्रभावकारी बनाउने योजना अघि बढाइएको छ। बलवा नगरपालिकामा आधुनिक सुविधासम्पन्न प्रशिक्षण केन्द्र निर्माण गरिनेछ, जसले स्थानीय श्रमिकहरूलाई दक्ष जनशक्ति बन्ने अवसर दिनेछ।
सरकारको दीर्घकालीन योजनाअनुसार, यो केन्द्रले श्रमिकलाई नेपाल भित्र र अन्तर्राष्ट्रिय श्रम बजारमा प्रतिस्पर्धी बनाउने लक्ष्य राखेको छ। रोजगारदाता संस्थाहरू तथा निजी क्षेत्रसँग सहकार्य गरी तालिम प्राप्त व्यक्तिहरूलाई रोजगारीका अवसर सिर्जना गर्ने नीति अवलम्बन गरिएको छ।
मन्त्री भण्डारीले भने, “नेपालका श्रमिकलाई सक्षम र आत्मनिर्भर बनाउन व्यवसायिक तालिमको नयाँ ढाँचा अपनाएका छौँ। मधेश प्रदेशका युवाले अब आफ्नै नगरपालिकामा उच्चस्तरीय तालिम लिएर देश तथा विदेशमा रोजगारी पाउने अवसर प्राप्त गर्नेछन्।”
सरकारको यो निर्णयले मधेश प्रदेशको रोजगारी संकट समाधान गर्न महत्वपूर्ण भूमिका खेल्ने विश्वास गरिएको छ। साथै, अन्य प्रदेशहरूमा पनि यस्ता व्यवसायिक तालिम केन्द्रहरू विस्तार गर्ने योजना रहेको छ।
