एसपी रिपोर्टर
काठमाण्डौं, जेठ १३: गृहमन्त्री रामबहादुर थापा बादलले मानसिकता परिवर्तण नभए सम्म बाहुनवाद र दलितहरु प्रतिको उत्पीडन अन्त्य नहुने भन्दै तल्लोजात भनेर हुने अपराध रोक्न सरकारले कानुन ल्याइरहेको बताए । प्रतिनिधीसभामा सांसदहरुले जाजरकोट रुकुममा भएको दलित युवक हत्या घटनाको सम्बन्धमा उठाएका प्रश्नहरुको जवाफ दिने क्रममा गृहमन्त्री थापाले यस्तो बताएका हुन ।
गृहमन्त्री थापाले भने, ‘ कतिपय माननिय ज्यूहरुले ब्राहमणवादको अन्त्य र जातिय उत्पीडन कलिहे अन्त्य हुन्छ भनेर जिज्ञासा राख्नुभएको छ, यस्मा के छ भने जव सम्म समाज भित्रको अन्तरनिहित चिन्तनको अन्त्य हुदैन तव सम्म यो समस्या यथावत रहन्छ, तर सरकारले यस्को अन्तय गर्न विभिन्न काम र कानुन निर्माण भइरहेको छ ।’ त्यसअघि सांसदहरुले देशमा ब्राहमणवाद र बर्चश्ववादी चिन्तनको कारण दलित युवकहरुको हत्या भएको आरोप लगाएका थिए । आरोपित वडा अध्यक्षलाई छोडिएको विषयमा गृहमन्त्रालयलाई जानकारी नरहेको समेत गृहमन्त्री थापाले बताए ।
सरकारले रुकुमको जातीय हिंसाबारे अध्ययन गर्न ५ सदस्यीय छानबिन समिति गठन गरेको छ । मंगलबार राष्ट्रियसभामा सांसदहरुले उठाएको प्रश्नको जवाफ दिँदै गृहमन्त्री रामबहादुर थापाले घटनाको अनुसन्धान गरेर रायसहितको प्रतिवेदन दिन गृहमन्त्रालयका सहसचिवको नेतृत्वमा प्रहरी वरिष्ठ उपरीक्षक, अनुसन्धान विभागको अधिकृत, महान्यायाधिवक्ता कार्यालयका अधिकृत र गृहमन्त्रालयको उपसचिव रहने गरी पाँच सदस्यीय छानबिन समिति गठन गरिएको जानकारी दिए ।
गृमहन्त्रीका अनुसार उक्त घटनामा ३ जनाको ज्यान गएको छ र ३ जना बेपत्ता छन् । जेठ १० गते रुकुम पश्चिम चौरजाहारी वडा नम्बर–८ का मल्ल थरकी युवतीसँग प्रेम विवाह गर्न जारजरकोट भेरी नगरपालिका वडानम्बर ४ का २१ का नवराज विक १९ जनाको समूह लिएर चौरजाहारी पुगेका थिए । त्यसबेला केटी लाने पक्ष र केटी पक्षबीच झडप भएको थियो । भाग्ने क्रममा नदीमा हाम फालेका नवराज विकको शव भेरी नदीको बीच भागमा फेला परेको छ । उनीसँगै गएका टीकाराम सुनार र गणेश बुढाको शव फेला परेको छ ।
फेला परेका शवहरु पोष्टमार्टमका लागि जाजरकोट अस्पतालमा राखिएको गृहमन्त्री थापाले जानकारी दिए । हालसम्म फेला नपरेका नपरेकाहरुको खोजी कार्य जारी रहेको गृहमन्त्री थापाले बताए । जजरकोटका वर्ष १८ का लोकेन्द्र सुनार, वर्ष १७ का गोविन्द शाही, वर्ष १७ का सञ्जु विक वेपत्ता रहेको र उनीहरुको खोजीका लागि गोताखोर परिचालन गरिने मन्त्री थापाले जानकारी दिए । रुकुमको घटनाबारे सरकारको ध्यानाकर्षण गराउँदै सांसद चक्र प्रसाद स्नेहीले समग्र दलितसँग सम्बन्धित घटनाहरुबारे अध्यन गर्न संसदीय समिति गठनको माग राखेका छन् ।
