एसपी रिपोर्टर
जनकपुरधाम, जेठ ८ : लकडाउनमा स्थानिय घर घरमा रहेको बेला धनुषामा अबैध ग्राबेल उत्खनन र तस्करी बढदै गएको छ । धनुषाको जगधर नदीमा मापदण्ड विपरित ४० फिट सम्म नदी खनेर ग्राभेल निकाल्न थालेपछि स्थानियवासीहरु विरोधमा उत्रेका छन् ।
धनुषाधाम नगरपालिका वडा नं. ३ मंगलपुर बस्ने धनुषबाबा कन्सट्रक्सनले मापदण्ड विपरित लकडाउनको मौका छोपेर अवैध उत्खनन र तस्करी गर्न थालेपछि नगरपालिकाको वडा नं. ६ मालटोलका साथै मिथिला नगरपालिकाकाका पुष्पवलपुर सहितका बासीन्दाहरु समेत विरोधमा उत्रिएका छन् ।
कन्ष्ट्रक्शनका सञ्चालक आनन्द साह, स्थानीय ऋषिकेश पाख्रिन, विन्देश्वर साह र शिवशरण यादव सहितका मिलेर उत्खनन गरिरहेको स्थानियको आरोप छ । लकडाउनको बेला रहेकाले सुरक्षा निकायकै मिलिभगतमा यस्तो गतिविधी भइरहेको उनीहरुको आरोप छ । धनुषामा जिल्ला समन्वय समिति, जिल्ला प्रशासन कार्यालय, जिल्ला प्रहरी तथा स्थानिय तहको सेटिंगमा अबैध उत्खनन जारी रहेको स्थानिय नटराज स्प्रिड इन्डष्ट्रिज प्रा.ली. का सञ्चालक मनोज यादव सहितकाको दाबी छ ।
मालटोल छेउको सो खोलामा दिन रात नभनी ग्राबेल उत्खनन भइरहेको र त्यसमा स्थानिय केहि युवाहरु समेत संलग्न रहेको आशंका स्थानियको छ । जगधर खोलाको ऐलानी तथा पर्ति जग्गामा अबैध ग्राभेल उत्खनन कार्य विरुद्व स्थानिय युवाहरु विरोधमा उत्रेका हुन । धनुषाका प्रमुख जिल्ला अधिकारी, जिल्ला समन्वय समिति धनुषाका सभापति तथा सम्बन्धीत पक्षलाई पटक पटक जानकारी गराउंदा समेत कुनै चासो नदेखाएको स्थानियहरुले बताए । उक्त अबैध उत्खन्न नरोकिए आफुहरु लकडाउनमै आन्दोलन गर्ने स्थानिय रामपुकार यादव, राधा लामा, सत्रुघन यादव, झगरु यादव सहितका स्थानिवासीहरुको चेतावनी छ ।
