आमरण अनशनको समर्थनमा सिरहामा प्रदर्शन

एसपी रिपोर्टर
जनकपुरधाम, भदौ ६ :
जनकपुरधाममा नयाँ कमला पुलको निर्माणको माग गर्दै जारी आमरण अनशनको समर्थनमा सिरहामा प्रदर्शन गरिएको छ । स्थानीय युवाहरू सिरहा सदरमुकाममा अनशनमा बसेका युवाहरुको समर्थनमा प्रदर्शन गरेका हुन् ।
बुधबार साँझ प्रधानमन्त्री केपी शर्मा ओली र मुख्यमन्त्री सतीशकुमार सिंहको पुतला दहन गरेका स्थानीय प्रदर्शनकारीले बिहिबार विरोध प्रर्दशन गर्दै नाराबाजी समेत गरेका छन् । उनीहरूले यसलाई कमला पुलका लागि वारपारको संघर्ष भनेका छन् । ’यो पुलका लागि विगतमा दर्जनौं आन्दोलन भए,’ स्थानीय सुनिल यादवले भने, ’तर, राज्यको रबैयाले हामी यसपटक वारपारको लडाइँमा छौं ।’
पुल निर्माणको सुनिश्चितता नभएसम्म यसपालिको आन्दोलन नरोकिने सिरहाका स्थानीयको अठोट छ । कमला नदीमा निर्माण भएको पुल गलत डिजाइन र कमसल कामका कारण सञ्चालनमा नआउँदै भासिएको भन्दै नयाँ पुल बनाउनुपर्ने उनीहरूको माग छ ।